Мәжіліс депутаты Еділ Жаңбыршин елдің ішкі саясатына сыртқы күштердің араласуына қарсы шығып, ҚР Премьер-министрі Олжас Бектеновке депутаттық сауал жолдады, деп хабарлайды Egemen.kz.
Ол сауалында Мемлекет басшысы Қасым-Жомарт Тоқаевтың Ұлттық құрылтайда айтқан сөздеріне сүйене отырып, сырттан қаржыландырылатын үкіметтік емес ұйымдардың (ҮЕҰ) елдегі саяси тұрақтылыққа кері әсер ету қаупі бар екенін мәлімдеді.
Депутат Жаңбыршиннің айтуынша, көптеген халықаралық ұйымдар мен қорлар демократия мен адам құқықтарын қорғау деген желеумен елдің ішкі саясатына араласуға талпынып келеді. Ол әсіресе АҚШ-тың Халықаралық даму агенттігі (USAID) арқылы соңғы он жылда Қазақстанға 150 миллион доллардан астам қаржы бөлінгенін атап өтті.
«Геосаясаттағы доминант мемлекеттер өзінің жеке мүддесі мен саяси ықпалын жүргізіп қана қоймай, оны іске асыру үшін әр түрлі әдіс-тәсілдерді пайдаланып келді. Мысалы, мемлекеттердің ұлттық құндылықтарын жоюға бағытталған әсірефеминистік, ЛГБТ, эмо және басқа да субъмәдениеттік қозғалыстар арнайы, жоспарлы түрде миллиондаған АҚШ долларымен қаржыландырылды», деді депутат.
Депутаттың сөзінше, Қазақстанда шетелдік гранттарға тәуелді кейбір ұйымдар елдегі жағдайды әдейі ушықтырып, жалған ақпарат таратады.
«Бізде шетелдік грант «емізігіне» отырып алған кейбір, тағы да айтам кейбір үкіметтік емес ұйымдар көбінесе, түймедейді түйедей қылып, негативті теріп-жинап, кураторларына өтірік есеп беріп, «ойбай бұл елде адам құқығы тапталған», «сөз бостандығы шектелген», «сіздер араласпасаңыздар құрдымға кетудің алдында тұрмыз» – деп байбалам салады. Тіпті біздегі жағдайды дамымай қалған үшінші мемлекеттермен негізсіз, дәлел-дәйексіз теңестіреді. Оларға Қазақстанның жақсарғаны емес, шайқалғаны пайдалы. Себебі өздерінің жеке басының пайдасына, яғни «гуманитарлық бизнестеріне» қаржы керек», деді Еділ Жаңбыршин.
Сонымен қатар Еділ Жаңбыршин АҚШ, Қытай және Ресей сияқты елдердің ішкі саясатына сыртқы араласуларға заңнамалық түрде тыйым салғанын мысалға келтіріп, Қазақстан да дәл осындай шара қабылдауы тиіс екенін айтты.
«Ең алдымен, Қаржы министрлігі мен тиісті мемлекеттік органдарды іске қосып, еліміздің ішкі саясатына араласуға бағытталған сырттан құйылған қаржыны анықтап, тиісті шара қабылдасын. Келесі, шетелден қаржыландырылатын ұйымдардың қызметін реттейтін қолданыстағы заңнаманың тиімділігіне талдау жүргізсін. Сондай-ақ, шетелдік гранттар арқылы қаржыландырылатын жобалар мен ұйымдардың қызметін бақылау және реттеу механизмдерін жетілдіру қажет», деді Е.Жаңбыршин.
Бұл ретте депутат бір мәселенің басын ашып алуды ұсынды. Яғни, сырттан келетін қаржы, егер таза болып, инвестиция ретінде экономиканы дамытуға құйылатын болса, экология мен денсаулық сақтау саласын жақсартатын болса, онда оған жол ашықтығын атап өтті.
«Ал, егер ішкі саясатымызға қарсы, ұлттық дүниетанымымызға жат, тұрақтылығымызды шайқайтын жобаларды қаржыландырса, онда ондай ұйымдарға жол жабық. Одан қалса Мемлекет басшысының Құрылтайдағы тапсырмасына сәйкес, Тәуелсіздік алғалы бірінші рет елімізде ішкі саясат Тұжырымдамасы әзірленеді. Бұл – ұлттық құндылықтарымыздың негізінде ішкі саясаттың бағыт-бағдарын, құрылымын және Ережелерін айқындайтын, ел мүддесі үшін саяси топтарды біріктіретін, осы шаралардың нәтижесінде мемлекетіміздің ішкі шаруасына араласқысы келетін саяси авантюристер мен деструктивті топтарға тосқауыл қоюғы мүмкіндік туғызатын стратегиялық құжат болмақ», деді депутат.
