Ел Тәуелсіздігінің 30 жылдығы қарсаңында Нұр-Сұлтан қаласында 20 мың орынға шақталған 7 мектеп ашылады.
2021 жылы елордада 15 мектеп салынып, шамамен 40 мың оқушыға орын тапшылығы шешілген болатын. Бірақ мектепке, бірінші сыныпқа баратын оқушылар саны жыл сайын өсіп, бітіруші түлектер санынан 3 есеге дейін артық болуы, мектеп тапшылығын тудырып отыр. Әрине балалар санының өскені қуантарлық жағдай. Сондықтан еліміздің жарқын болашағы балаларымызды балабақша, мектеппен қамтамасыз ету кезек күттірмейтін мәселе болып отыр. Халық санының жыл сайын өсуі мен көбеюін ескере отырып, қала әкімдігі оқу орындарының құрылысы бойынша жүйелі жұмыс жүргізуде. ОКҚ алаңында өткен брифингте елорда әкімі Алтай Көлгінов қалада салынып жатқан мектеп құрылысы туралы мәлімдеді.
– Елордада жыл сайын ішкі көші-қон есебінен де, бала туу есебінен де адамдар саны өсуде. Соңғы 10 жылда оқушылар саны 3 есеге артты. Мысалы мамыр айында 7 мың түлек болса, бірінші сыныпқа 25 мың оқушы келеді. 2030 жылға қарай Нұр-Сұлтанда 400 мыңға дейін оқушы болады деп ойлаймыз. Әрине, бұл тамаша перспективалар, сонымен бірге бұл мектептердің белсенді құрылысын талап етеді.
2020 жылмен салыстырғанда 2021 жылы екі есеге көп, 2019 жылмен салыстырғанда төрт есе көп мектеп салдық. Бұл үш ауысымды мектептер санын бірнеше есеге қысқартуға және оқыту режимін қайта тығыздауға мүмкіндік берді, – деді елорда әкімі Алтай Көлгінов.
ҚР Президенті Қасым-Жомарт Тоқаев оқу орындарының құрылысына ерекше көңіл бөлу керектігін ескертіп, мектептер санына арттыруды тапсырған-ды. Мемлекет басшысының тапсырмасына сәйкес 2022 жылы елордада тағы 16 мектеп салынады. Кешенді жоспар аясында 5 жылдық кезеңге 70-ке жуық мектеп салу жоспарланған. Бұл процеске жеке инвестициялар да тартылады.
Қала басшысының айтуынша, құрылыс кезінде мектептердің материалдық-техникалық жабдықталуы да ескеріледі: IT және STEM-кабинеттер-оқушылар 3D-объектілерді құра алады, роботтарды үлгілей алады, ғылыми-техникалық білімдерін бірден практикада қолдана алады, инклюзия, педагогикалық-психологиялық түзету кабинеттері де жұмыс істейді.
Оқу орындарына қажеттілік бар аудандарға назар аудара отырып, білім мекемелері қаланың барлық аудандарында, соның ішінде тұрғын алаптарында көптеп салынып жатыр. Оқу орындарының құрылысымен қатар, қолданыстағы мектептерге де да тиісті көңіл бөлінеді. Бүгінге дейін заманауи сұранысқа сәйкестендіріліп, 26 білім беру нысаны (мектептер, балабақшалар, колледждер) жөнделді.
