Мемлекет басшысы Қасым-Жомарт Тоқаевтың «Әділетті Қазақстанның экономикалық бағдары» атты Қазақстан халқына Жолдауында: «Қазіргі заманда азаматтардың шығармашылық әлеуетіне және зияткерлік капиталына арқа сүйейтін «креативті өндіріс» салалары шынайы инклюзивті экономиканы дамытудың қайнар көзі саналады. Бұл аз десеңіз, креативті экономика дарынды әрі шығармашыл адамдарды өзіне тартатын ірі қалалардың дамуына ықпал етуші күшке айналуда. Қазақстанда бұл сала әлі дамымаған. Креативті индустрияның ішкі жалпы өнімдегі үлесі бір пайызға да жетпейді, жұмыспен қамту саласындағы үлесі өте төмен. Дегенмен дарынымен бүкіл әлемді мойындатып жүрген отандастарымыз аз емес. Біз елімізде креативті экономиканың жан-жақты дамуына барлық жағдайды жасауымыз керек. Соның ішінде зияткерлік меншікті қорғайтын құқықтық тәсілдер қажет. Бұл – өте маңызды мәселе», – деген еді.
Креативті шығармашылық индустрия, бұл – әртүрлі шығармашылық және мәдени салаларды: өнер, дизайн, медиа, ойын-сауық, сән, архитектура, музыка, кино, теледидар, жарнама және тағы басқасын қамтитын экономика бөлімі. Ол шығармашылық өнімдерді, қызметтерді және контентті жасаумен, өндірумен және таратумен байланысты көптеген кәсіби қызметтердің басын қосады. Креативті шығармашылық индустрия жайлы соңғы уақытта жиірек айтылып, осы салаға мемлекет те аса мән беруде. Азаматтардың әл-ауқатын арттырып, өмір сүру сапасы мен өзіне деген сенімділікті қалыптастыруына бұл жағдай көп үлесін тигізері даусыз. Президентіміз осы саланы ауқымды дамыту үшін барлық жағдай жасалу қажет екенін баяндаған. Шығармашылық индустрияны қолдау бойынша жеке шаралар кешенін әзірлеу, оның ішінде әрбір облыс орталығы мен ірі қалада шығармашылық индустрия орталықтарын қалыптастыру, қатысушыларға өз өнімдерін коммерцияландыру мәселелері бойынша көмек көрсету жөнінде өз Жолдауында нақты міндет қойған еді.
Қазірде дамыған мемлекеттер шығармашылық индустрия арқылы туризм, сауда, білім беру секілді салаларды да қатар өркендетуде. Айтар болсақ, Ұлыбритания, Аустралия, АҚШ сияқты мемлекеттерде бұл мәселеге қатты назар аударып отыр. Креативті экономика кез келген қоғамдастық үшін салыстырмалы түрде қолжетімді. Себебі ол нақты табиғи ресурстарды, қолайлы географиялық орынды немесе бәсекелестік артықшылықтың басқа сыртқы факторларын қажет етпейді. Ол үшін тек білім мен талант болса болғаны. Осыған орай мемлекеттің бұл салаға айрықша қолдау көрсетіп отырғаны қуантады.
Бізде креативті индустрия орталықтары 3 ірі қала – Астана, Алматы, Шымкентте шоғырланған, ал өңірлер назардан тыс қалып отыр. Сондықтан да Мемлекет басшысы «Креативті индустрия субъектілері өндіріс ерекшелігіне байланысты кәсіпкерлікті қолдау бағдарламаларына толық қатыса алмайды, қаржылай көмек те ала алмайды. Оларға қолдау көрсетуге арналған шаралардың жеке топтамасын әзірлеу қажет деп санаймын» деген болатын. Креативті индустрия – өңірлерімізді де, тұтастай алғанда елімізді де дамытудың кешенді жұмысы. Сондай-ақ медиа, мәдениет пен креативті саланы біріктіру – кешенді және жүйелі жұмыс атқарудың бірден-бір жолы. Бұл бағытты дамыту жөніндегі қызметтің тиімділігін арттыру үшін барынша күш-жігер салу қажет. Президент Қасым-Жомарт Тоқаев экономика үшін аса қажетті креативті индустрияны қолға алуды бұдан бірнеше жыл бұрын атап айтқан еді. Қазір сол бастама ел игілігі үшін маңыздылығын көрсетіп отыр.
