«Ауыл аманаты – ел аманаты» атты «АMANAT» партиясы, ҚР Ауыл шаруашылығы министрлігі, ҚР Оқу-ағарту министрлігі, ҚР Денсаулық сақтау министрлігі, ҚР Еңбек және халықты әлеуметтік қорғау министрлігі, «Ардагерлер кеңесі» РҚБ, «ЕлАна» қоғамдық, әлеуметтік-танымдық сайты, «Qazaqstan dauiri» газеті, «Мөлдір бұлақ» журналының бірлескен экспедициясы Шымкент қаласында
Шымкент қаласына аптаның жексенбісі күні табаны тиген экспедиция мүшелері, яғни «Qazagstan dauiri» газетінің Бас директоры Сәуле Мешітбайқызы мен «Мөлдір бұлақ» журналының Бас редакторы Дәулетбек Байтұрсынұлы және осы жолдардың авторы демалысты да тиімді пайдаланып, «өлі разы болмай, тірі байымас» деген ұстаныммен Қ.А.Ясауи бабамыздың ата-анасы, топырағы сансыз бабтар мекені – Сайрам ауылынан бұйырған Ибрагим баба мен Қарашаш ананың басына барып, зиярат етті. Содан кейін Төлеби ауданының тау бөктеріндегі Бекасыл әулие мен Мыңшейіт қорымына да арнайы ат басын бұрып, құран бағыштады.
Соңғы аталған екі әулиеге қысқаша тоқталып өтер болсақ, бүгінде Кеңесарық деп аталатын ауылда 1822 жылы кіндік қаны тамып, Алла берген табиғи дарыны мен ынта-ықыласының арқасында сонау Бұқарадағы атақты Көкілташ медресесін, Сайрам, Қарнақ, Ташкент, Самарқант, Шам (Сирия) еліндегі білім ордаларын түгел меңгеріп, көзінің тірісінде-ақ Бекасыл әулие атанған бабамыз теолог, астролог, астроном, математик, философ, шипагер, бақ қонған, кие дарыған кісі болған. Бекасыл Биболатұлы туған жерінде медресе ашып, сол аймақтың балаларын оқытқан, шығармашылықпен айналысып, көптеген кітап жазған. Әулие жайында оның еңбегіне ерекше зейін қойған Мырзатай Жолдасбеков былай дейді: «Бүгінгі ұрпаққа Бекасыл Биболатұлынан әзірге жеткені «Зикзал» атты ғибрат кітабы – халқымыздың тəуелсіздік жылдарында тапқан асыл қазыналарының бірі. Тек қазақ халқының ғана емес, бүкіл адамзаттың қымбат жауһарларының бірінен саналатын бұл шығармада Исламның асыл қасиеттері, адамзаттың байтақ тәжірибесі, салт-дәстүрі, замананың ой санасы, ғылымның сан-саласы қамтылған, қазақ топырағында бұрын кездеспеген, өмір тылсымдарының сырлары мен құпияларын ашатын, адамның күнделікті өміріне керекті пайдалы кеңестер, ғылыми мәліметтер мен басқа да тұжырымдар бар.
Қазақ руханиятындағы алып тұлғалардың бірі Мәшһүр Жүсіп Көпейұлының Оңтүстікке сапарын баяндайтын, «Қазақ баласы оқыдым, тоқыдым десе де, Бекасыл хазрет бола ма?» деп аталатын мақаласында Бекасыл әулиені аса құрметпен хазрет, ұстаз деп атайды және пір тұтады, ғұламаның қадір-қасиетін айшықты аша түседі, оның «Зикзал» атты еңбегін аса құнды, баға жетпес туынды деп бағалайды. Отандық ғалымдардың пікірінше, «Зикзал» – кез келген қазақтың төрінде тұратын қасиетті кітап. Қазақстан мұсылмандары діни басқармасы Ғұламалар кеңесінің мүшесі, белгілі дінтанушы, араб, парсы және шағатай тілдерінде жазылған «Зикзалды» қазақ тіліне аударған Зәріпбай Оразбай бұл еңбекті әлемдік деңгейдегі Ханафи мазһабын дәріптейтін бірден-бір ғылыми кітаптардың қатарына жатқызады».
1915 жылы қайтыс болған Бекасыл әулиенің есімі қазір өзінің туған ауылындағы мектепке беріліп, сол білім ордасының қарама-қарсы тұсында сәулетті ескерткіші бой көтерген. Ауыл қорымындағы қабірі мен кесенесі, қара шаңырағының басындағы бірнеше бұлақ әулие әруағына құран бағыштап, зиярат етушілер жиі табан тірейтін қасиетті мекенге айналған.
«Мыңшейіт» қорымының да ұзақ ғасыр бұрынғы тарихы бар. Ол туралы көнекөз әңгіме, құлақтан-құлаққа жеткен бағзы аңыз былай дейді: VIII-ІХ ғасырларда араб халифаты Орта Азияға Ислам дінін тарату үшін жорыққа шыққаны белгілі. Олар осы Сайрам аймағына келгенде, мұндағы көк Тәңірге жалбарынатын жергілікті түркілердің зор қарсылығына тап болады. Алайда, күші басым араб әскерлері біртұтас бірікпеген түркі жауынгерлерінен үстем түседі. Амалдары таусылған түркілер арабтардың осал тұстарын іздеуге кіріседі. Ойлары іске асып, жаудың жанды жерлерін біледі: Аллаға бас иетін арабтар күнде бес рет намазға жығылады екен. Намаз кезінде олар қаруларын қалдырып, аттарын байлап, сапқа тізіліп, құбылаға қарап жығылады екен. Осы сәтті аңдыған түркілер мұсылмандар намазға жығылғанда лап қояды. Намазын бұзбаған күйі шейіт болған мыңға жуық адамның мәйіті беткейге жерленген екен. Содан бері бұл жер Мыңшейіт аталады. Мұның «Мың» дегені мың адамды білдірсе, «шейіт» сөзі дін жолында құрбан болған деген ұғымды айғақтайды.
Аптаның алғашқы күнінде Сәуле Мешітбайқызы мегаполисте биылғы оқу жылының басында ашылған «Қазбілім» Шымкент ұлттық лицейінде қонақта болып, ұрпақ аманаты тақырыбында оқушы, ұстаздармен ашық-жарқын кездесу болып өтті. Лицей директорының аты-жөні – Роман Байбатша. Кездесуді ашып, жүргізіп отырған директордың Оқу ісі жөніндегі орынбасары Жұлдызай Юнусова жалпы мектептің бүгінгі жай-күйі мен алға қойған мақсаттарын таныстырып, Сәуле Мешітбайқызына сөз берді. Ұлттық лицейдің ерекшелігін айрықша атап өткен Сәуле Мешітбайқызы сапалы біліммен қатар саналы тәрбие алудың маңызына тоқталып, ұлттық құндылығымыз төңірегінде тереңінен сөз қозғады. Әсіресе, әлеуметтік желінің жастар тәрбиесіне тигізер кері әсерін көбірек әңгімеледі. Оқушылар тарапынан да лицей қонағына ұлт болашағы үшін өте маңызды, ойлы сауалдар қойылды.
Сәуле Мешітбайқызы бастаған экспедиция мүшелері келесі кезекте «AMANAT» партиясы Шымкент қалалық филиалының және қалалық мәслихаттың төрағасы Бахадыр Нарымбетовпен, Шымкент қалалық ішкі саясат және жастар ісі жөніндегі басқарма басшысы Әйгерім Жұмағұловамен жолығып, ортақ іс-әрекет, ортақ мәселе төңірегінде әңгімелесті.
Жалпы, Шымкент мегаполис мәртебесін иеленгенімен, қала аумағының үлкендігі ауылшаруашылығымен де айналысуға мүмкіндік береді. Шымкент қаласында ауылшаруашылығы, оның ішінде мал, егін, әсіресе жылыжай шаруашылығы жақсы дамып келеді. Мәселен, сүтті бағыттағы сиыр бағатын «Эгамназаров» ЖК-ның фермасында 200 бас ірі қара бар. Жеті адамды жұмыспен қамтып отыр. Ал, «BIO Food kz», «Izmir Trade» жауапкершілігі шектеулі серіктестіктер сүттен ірімшік, сыр, чечил секілді өнімдерді өндірумен айналысады. Мұның алғашқысы тәулігіне 25 тонна, кейінгісі жылына 700 тонна сүтті қайта өңдеуге қауқарлы. Әрқайсысында 15-25 адам аралығында жұмыс істейді. «Аймар құс» ЖК-ның құс фабрикасында жылына 72 миллион данаға дейін жұмыртқа өндіріледі. Мұндағы тұрақты жұмыс орнының саны 40-70 аралығында. Жылыжай шаруашылығымен айналысатын «TRADE AGRO INVEST» жылыжай кешенінде жылына 600-700 тонна қияр мен қызанақ өсірілсе, «IGM Corporation» ЖШС-ның жылыжай кешенінде 800 тоннаға дейін өнім өндіріледі. Әр кешенде 20-40 аралығында жұмысшы жұмыс істейді. Жалпы, жазы ұзақ әрі ыстық, қысы қысқа, жайдары Шымкент жылыжай шаруашылығын дамытуға қолайлы өңір есептеледі.
Шымкенттің тыныс-тіршілігімен, бірқатар шаруашылықтармен танысқан экспедиция мүшелері кестеге сай көрші Жамбыл облысына жол тартты.
