Ақтөбе облысы Қарғалы ауданы Шәмші Қалдаяқов ауылында тұрғындардың қорасындағы тауық қырыла бастады. Оқиға 16-20 қараша аралығында болған. Ветеринариялық бақылау және қадағалау комитетінің Ақтөбе облыстық аумақтық инспекциясының басшысы Кеңес Қанадбаев: «Мамандарға мәлімет кеш келіп түсті. Барлығы 200-ден астам тауық қырылып қалды. Осы оқиғадан соң сынамалар алынып, Нұр-Сұлтан қаласына жіберілді. Қазіргі кезде шешімін күтіп отырмыз. Нақты диагнозы белгілі болған соң шектеу шарасын қолдану туралы шешім шығарылады. Болжам бойынша, тауық арасында кездесетін Ньюкасла ауруы. Ел-жұрттың арасында «құс тұмауы» деген сөз бар. Бірақ ол шындыққа жанаспайды. Біріншіден, күзде құс тұмауына қарсы екпе жүргізілді. Екіншіден қаз-үйрекке жұқпаған», – дейді.
