Бүгінде бабаларымыздың хаты жетпеген жерге балаларымыздың табаны тиді. Еліміз Тәуелсіздік алғалы қаншама жерлесіміз алыс-жақын шетелдерде білім алып жатыр. Қазір шетелде жұмыс істеуді армандап қана қоймай, оны алдына мақсат етіп қойған жастардың қатары көбейді.
Соңғы жылдары түрлі мемлекеттік бағдарлама аясында сан мыңдаған жерлесіміз шетел асып, «инемен құдық қазуда». Ал, мұның сыртында әртүрлі шетелдік гранттармен өзге елге қанат қаққан жастарымыз қанша? Санын дөп басып айту қиын. Сол жастарымыз өзге елден нендей тың жаңалық, тың серпіліс әкеліп жатыр?
Әрине, келешектің көкжиегін кеңейту үшін жастарымыздың дамыған елдерді көруі, сол жақтан дәріс алып, тәжірибе жинақтап, елінің кемесін алға сүйреуі қажет-ақ. Мұны жоққа шығаруға болмайды. Соңғы уақытта телекоммуникация нарығы белсенді дамып келеді.
Халықты интернет желісіне жаппай қол жеткізумен қамтамасыз ету – байланыс саласын, сондай-ақ, «Цифрлық Қазақстан» мемлекеттік бағдарламасын дамыту жөніндегі негізгі міндеттердің бірі. Қазақстандықтардың сапалы интернетте қажеттілігін қанағаттандыру үшін бүгінгі күні төмендегідей сымсыз және сымды технологиялар қолдануда көпке үлгі болып, өзінің білгенін үйретіп келе жатқан осындай іскер, 27 жастағы белсенді жастарымыздың бірі Павлодар қаласының тумасы – Ерлан Ерболатұлы телекоммуникация саласында талай өзгерістерді енгізіп, тұрғындардың жоғары сапалы телефон байланысы, интернет пен телевизияға қол жеткізуіне мүмкіндік беруіне зор үлес қосуда.
Бүгінде билік жүйесі жаңа ғылыми технологияны пайдаланып, ғаламтор желісі, электронды қызмет түрлері сияқты адам санасы тудырған жетістіктермен жүзеге асырылуда. Жаһандану заманында халық пен билікті бір-бірімен байланыста ұстау үшін екі жақтық көзқараспен санасатын мамандар қажет.
Осындай жаңаша көзқарасты, білікті инженер Ерлан 2019 жылы Польшадағы Жешув қаласында оқып жүріп, осы салада жұмыс істей жүріп, тәжірибе жинақтаған. Бүгінде Ерлан – компанияның ең жоғары білікті мамандарының бірі. Ол SDN АЕМ ТОБЖ жобаларын іске асыруға атсалысып, қаладағы, ауылдағы желіні интеграциялау және жаңғыртуға мол еңбек сіңіріп келеді. Жұмыста өзінің тікелей міндетін атқара жүріп, әріптестерінің білігін арттыруға да атсалысады.
Ол:
– Жалпы, шетелде бизнесті дамытудың ерекшеліктерін өз тәжірибемнен айта аламын. Интернет сауда әр елде әртүрлі деңгейде дамыған, тұрғындарының көзқарасы да алуан. Бұл қадам қандай саланы болса да дамытуға үлкен серпіліс әкеледі.
Болашақ бүгіннен басталады. Жетістікке жеткіміз келсе, өз-өзімізге сенімді болуымыз қажет. Шын сенімді болу үшін, сенімге лайық болу керек. Еңбектенсең міндетті түрде өзіңнің бір белесті бағындыратыныңа ерікті түрде сене аласың. Міне, еңбек үлгісі сені сенімділікке жетелейді.
Осындай үлкен жауапкершілікпен сенімді арқалап, университеттен кейін «Қазақтелекоммен» келісімшарттар жасасып, тірлікке жең түре кірістім.
Бұл – жалғыз адамның емес, үлкен ұжымның еңбегі. Мен жетекшілік ететін ұжымның әр мүшесі осы жеңістің бір бөлігі. Қызметкерлердің күнделікті жұмысы компанияның дамуына алып келетіні сөзсіз. Біз командамен бірге жұмысты жауапкершілікпен, сапалы және уақытылы орындайтын мамандар ретінде танылып, сенімге ие болдық және біліміміз бен білігімізді дәлелдедік. Жетістіктеріміздің бірі – үздік деп танылған нысандар және олардың үлгі ретінде өзгелерге көрсетілуі болды.
Грузин ақыны Шота Руставели «уақыттың да уақыты жоқ» демекші, кез келген әрекеттің уақытымен болғаны абзал.
Президентіміз жуырда «Ана тілі» газетінің редакторы Ерлан Жүніске берген сұхбатында осы туралы былай деген болатын:
«Ақиқатында жастардың кәсіби біліктілігін көтеру немесе көбірек табыс табу үшін шетелге шығуы қалыпты нәрсе деп ойлаймын. Олар үйреншікті мекенін тастап, өмірін күрт өзгертуден қорықпауы керек. Тіршілікке бейім, ширақ болуға тиіс. Өмір бойы бір ауылда немесе бір қалада тұрып, жарты ай жұмыста болғаны үшін биліктен жоғары жалақы талап ететін заман әлдеқашан келмеске кетті. Қазіргі жастар ондай болмауға тиіс. Қарым-қабілетің қай жерде қажетке жараса, сонда баруға тырысу керек. Баратын жерің ірі шаһар немесе басқа өңір, тіпті басқа ел болуы да мүмкін. Қазақта «Жүргенге жөргем ілінеді, жатқанға жан жуымайды» деген сөз бар.
Өскелең ұрпақ үшін жақсыға еліктеп, олардың игі істерін өмірлік мақсаттарына айналдыра білуі өте маңызды. Менің де бала кезімде үлгі тұтқан тұлғаларым болды. Жастарға дұрыс үлгі бола алсақ, біз үшін үлкен мәртебе. Қазір өзіме артылған жауапкершілікті толық сезінемін және соған сай екі есе артық жұмыс істеуге тырысамын, – дейді Ерлан Ерболатұлы.
Байланыс саласының адам өмірі үшін мәні ерекше. Бұрын айлап-апталап, екі көздері төрт болып, зарыға, хат-хабар күтіп отыратын халық қазір тіпті, шетелде жүрген баласының жайын қалта телефон, тағы да басқа заманауи құрылғылар арқылы табан астында біле алады. Осындай байланыс телефондарының үзіліссіз жұмыс жасауын қадағалайтын, ұжымды ғана емес, саланың көшін де алға сүйреген Ерланның еңбегі мақтауға тұрарлық.
Иә, талапты жастың талпынысы қандай мақтауға да лайық. Лайым, Ерландай жалынды жастардың жігері өзгелерге үлгі болсын деп тілейміз!
Есен Өтеулиев
