Батыс Қазақстан облысындағы “Ұйымдасқан қылмысқа қарсы күрес басқармасы” қызметкерлері Оралдағы ойын-сауық орындарында жедел-алдын алу іс-шарасын өткізді. Бұл туралы облыстық полиция департаментінің баспасөз қызметі хабарлады.
Тәртіп сақшылары Мемлекет басшысының «Заң алдында бәрі бірдей» - деп, Ұлттық құрылтайдың үшінші отырысында айтқан сөзін берік ұстанып келеді. Осыған орай “Ұйымдасқан қылмысқа қарсы күрес басқармасының” қызметкерлері Орал қаласы прокуратурасының, бірқатар полиция қызметтері мен басқа да ведомстволар қызметкерлерімен бірлесіп, облыс орталығының 11 ойын-сауық орнында жедел-профилактикалық іс-шаралар өткізді. Көңіл көтеру орындарын тексеру барысында тиісті құжаттарсыз жүрген 26 күзетшінің заңсыз қызметі анықталған. Күзет бекеттерін тексеру кезінде қолдан жасалған таяқтар, жиналмалы қалта пышағы, "Таран" маркалы 2 резеңке таяқ табылып, тәркіленген. Барлық күзетшілерге қатысты тиісті шаралар қабылдау мақсатында БҚО бойынша МКД-ға бастапқы материал жинақталған.
Сонымен қатар мекемелердің бірін тексеру кезінде қызметтік иттердің көмегімен сары түсті ұнтақ заты бар "ЗИП пакет" табылып, осы факті бойынша ҚР ҚК-нің 296-бабына сәйкес тергеу басталған.
Қоғамдық орында "кальян" қызметін көрсетіп, пайдаланғаны үшін мекемеге келушілер мен әкімгерлерге қатысты 14 әкімшілік хаттама толтырылған. Ойын-сауық орындарында жұмыс жасап жүрген 9 кәмелетке толмаған жасөспірім анықталған. Олардың ата-аналары мен мекеменің әкімгерлеріне қатысты 10 әкімшілік хаттама толтырылған. Сондай-ақ Орал қаласының пробация қызметінде есепте тұрған 2 адам келуші ретінде анықталса, тағы екеуі тәуліктің түнгі уақытында бұл мекемелерде заңсыз жұмыс істеген. Әскери қызметке шақырылушылар тізіміндегі екі адам облыстық қорғаныс істері жөніндегі департаментіне жеткізілген.
БҚО Полиция департаментінің баспасөз қызметінің мәліметінше, аталған бағытта жұмыстар әлі де жалғасады.
БҚО ПД Баспасөз қызметі
