Кешелі-бүгін Тимур Құлыбаевқа тиесілі «ҚамқорЛокомотив» пен «ҚамқорВагон» компанияларының ресейлік кәсіпкерге тиесілі консорциумға сатылып жатқаны белгілі болды.
Осыған қатысты пікір білдіріп, мәселені құзырлы органдар қарауы керек екенін мәлімдеген Мәжіліс депутаты Ерлан Сайыров өзінің Facebook парақшасында: «Тимур Құлыбаевқа тиесілі деп аталатын «ҚамқорЛокомотив», «ҚамқорВагон» кәсіпорындары Ресей бизнесменіне сатылды деген ақпарат шықты. «Түйені түгімен жұтып», енді стратегиялық нысандарды шетелге сата бастады. Бұл мәселе бойынша, мәміленің заңдылығы мәселесімен құзырлы органдар айналысуы тиіс деп есептеймін. Тіпті ресейлік кәсіпкер және инвестор Алексей Лебедев кәсіпорынды дамытуға қатысты жоспарымен де бөліскен көрінеді», – деп жазды. Айта кетерлігі, жоғарыда аттары аталған қос компания Қазақстандағы ірі вагон және локомотив жөндейтін кәсіпорын мен депоны біріктіреді.
