Жаңа Салық кодексінде жаңалықтар көп

Елімізде жаңа салық кодексін жетілдіру саласында қыруар жұмыстар атқарылып жатыр. Бұлардың басты ерекшеліктері – инвестиция тарту, дайын өнімдер шығару, күрделі өңдеу салаларын дамытуға мемлекеттік тұрғыдан қолдауды арттыруға бағытталып отыр. Қарапайым тілмен айтар болсақ, бұрынғыдай жалпыға ортақ салық мөлшерлемесінің орнына, жеңілдетілген және әртараптандырылған салып мөлшерлемесі қолданысқа енетін болмақ. Бұл туралы Премьер-министр Олжас Бектенов бастаған лауазымды тұлғалар биік мінбелерден айтып келе жатыр. Мәселен 28 мамыр күні онлайн форматта өткен жиналыста Үкімет басшысы: «Жаңа Салық кодексінің жобасында салық ставкасы шығарылатын тауардың өңдеу деңгейіне байланысты. Яғни кәсіпорын жоғары өңделген тауар шығарса, салық ставкасы төмен болады, ал жай шикізат шығаратын болса, салық жоғары болады. Бұл өндірістік дамуды ынталандыратын маңызды қадам», – деп түсінік бергені есімізде.Қазіргі Салық кодексі бюджет кірістері мен экономикадағы өсімді ынталандыру арасындағы теңгерімге қол жеткізуге бағытталғандығын да айта кеткен жөн. Бұл туралы Премьер-министрдің орынбасары – Ұлттық экономика министрі Нұрлан Байбазаров маңызды ерекшеліктері туралы тоқталып өтті. – Құжаттың негізгі міндеті тепе-теңдік принципі болып саналады. Салық кодексі, бір жағынан, әлеуметтік саланың жұмыс істеуі және басқа да мемлекеттік міндеттерді орындау үшін бюджеттің жеткілікті кірісін қамтамасыз етуге тиіс. Екінші жағынан бизнес пен инвестицияларды ынталандыру, экономикалық өсімді және өндірісті ұлғайтуды қамтамасыз ету. Негізгі бағыттардың бірі ынталандыру және қолдау шараларын, сондай-ақ процестерді толық цифрландыруды қамтитын, сервистік модельге көшумен салықтық әкімшілендіруді жетілдіру болады. Біз бизнесті ашқаннан бастап сүйемелдеу үшін жазалау шараларынан консультативті және қолдау шараларына көшуіміз керек. Мемлекет басшысы салықтық жеңілдіктердің кем дегенде 20%-ға қысқарту міндетін қойды. Біз жағдайды жалпы бағалау бойынша жұмыс жүргіздік және енді нақты шараларды ұсынамыз», – деді Нұрлан Серікұлы