Қоғамда ғасырлар бойы қалыптасқан көзқарас бойынша әйел затының басты міндеті – үй шаруасы мен бала тәрбиесі деп есептеледі. Бұл ұғым көптеген дәстүрлі қоғамдарда әлі күнге дейін сақталып келеді. Дегенмен қазіргі заманда әйелдің рөлі бұдан әлдеқайда ауқымды екені айқындала түсуде. Әйел тек ошақ қасында жүрумен ғана шектелмейді. Ол – білімді маман, қоғам белсендісі, ғылым мен саясаттағы көшбасшы, кәсіпкер және, ең бастысы, өз өмірінің толық иесі.
Әрине, отбасы құндылығы мен үй шаруасын жоққа шығаруға болмайды. Үйдің берекесі, ұрпақ тәрбиесі көбіне әйелдің қолында екені шындық. Алайда бұл – әйел тек осы рөлмен ғана шектелуі керек дегенді білдірмейді. Қазіргі заман – мүмкіндіктер заманы. Бүгінгі әйел – бір мезетте әрі ана, әрі кәсіпкер, әрі мұғалім, әрі басшы бола алады. Бұл – таңдау еркіндігінің, білім мен біліктің, әлеуметтік қолдаудың арқасында мүмкін болған жетістік. Мысалы, елімізде ғылым саласында жаңалық ашып жүрген, ірі компанияларды басқарып отырған, халықаралық ареналарда ел намысын қорғап жүрген нәзік жандылар аз емес. Олар қоғамға пайда әкеліп қана қоймай, өздерінен кейінгі ұрпаққа жол көрсетіп жүр. Бұл – әйелдің қоғамдағы орны мен мүмкіндігінің шексіз екенін дәлелдейтін нақты мысал. Әйел затының үй шаруасымен ғана шектелуі – оның әлеуетін толық пайдаланбау деген сөз. Жоғары білім алып, мансап құрып, арманына жетуге ұмтылатын әйел – қоғамның қозғаушы күші. Сондықтан әрбір әйел өзінің таңдауын өзі жасап, өмірлік жолын жүректе сеніммен бастауға тиіс. Отбасы мен қызметті қатар алып жүру – қиын, бірақ мүмкін дүние. Ең бастысы – қоғамдағы көзқарасты өзгертіп, әйелдің таңдау еркіндігін қолдау.
Қорытындылай келе, әйел тек үй шаруасымен шектелмейді. Ол – өмірдің барлық саласында өз орнын таба алатын, көпқырлы тұлға. Қазіргі заманда әйелдің үйден тыс әлемде де алатын орны зор. Мұхтар Мағауиннің өзі “ Қыз кем емес тең. Ертең ана болып үй билейді. Ақылы асса ел билейді” - деп әйел тек үй шаруасымен шектелмейтініне куәлік еткен. Сондықтан әйелдің мүмкіндігін шектеу емес, қолдау қажет. Өйткені әйел – қоғамның жартысы ғана емес, жүрегі.
“Тұран” университетінің ‘’Журналистика’’ мамандығының 4- курс студенті: Назерке Зайфун
