Тәуелсіз еліміздің негізгі тірегі – татулық пен тұрақтылық. Ал жарқын болашағымыздың кепілі – жастар. Ендеше бүгінгі жас буын ата-бабамыздан қалған құндылықтарды қастерлеп, ұрпақтан-ұрпаққа жалғастыруы қажет.
Жастарды рухани адамгершілікке тәрбиелеуде ислам дінінің алатын орны жоғары. Жалпы біз тілімізді, дінімізді, салт-дәстүрімізді мәңгі ұмытпауға, оны әрдайым есте сақтауға міндеттіміз. Өскелең ұрпақты имандылыққа тәрбиелей отырып, халық дәстүрін жүрегіне ұялатып, санасына жеткізу – білім мен тәрбиенің басты міндеті, ортақ парызымыз. Имандылықтың негізгі құралы – халық даналығы. Бағзы заманнан ата-бабамыз адам баласын асып-таспауға, қанағатшыл болуға, адамгершілікке, білім-ғылымға үндеп, ауызбіршілікке және ынтымақтастыққа шақырады. Терең біліміне сай өнегелі тәрбие алған иманды азамат – еліміздің жарқын болашағының кепілі.
Соңғы жылдары жастарымыз ислам дініне бет бұрып, өздерінің парыздарын орындауға құлшыныс танытуда. Мұның өзі көңіл қуантады. Дейтұрғанмен, бұл ретте оларға дәстүрлі дін саласы өкілдерінің, дінтанушы және теолог мамандардың ақыл-кеңесі ауадай қажет. Жастарымыз теріс жолға түсіп кетпей, өзіміздің салт-дәстүрімізден адаспай, ата-баба жолын жалғастырғанын бақылауға алудың артықтығы жоқ. Себебі жастардың діни сауаттылығы – бүгінгі қоғамдағы өзекті мәселелердің бірі екені жасырын емес. Жастардың рухани санасын оятуда діннің алар орны ерекше.
Бұл ретте отбасының да атқарар өз жауапкершілігі бар. Бала – отбасының ұрпақ жалғастырар ізбасары, шаңырағының тірегі, жанұясының айнасы. Ата-ананың басты міндеті – перзентті өмірге әкелу ғана емес, оны қоршаған ортаға, адамзатқа, өз қоғамына пайдалы етіп тәрбиелеу. Ата-ананың тәрбиесін ешкім де, еш нәрсе де толтыра алмайды, ол ақиқат.
