Шымкенттегі №89 мектептің жылыжайы экзотикалық баққа айналған. Қазір оқушылар банан, апельсин және лимон жинауда. Алғашында жас бағбандар тропикалық өсімдіктерді қызығушылықпен өсіре бастаған. Өсе келе өнім береді деп ойламаған. Ал жеміс бере бастағанда оқушылардың қызығушылығы тіптен артқан.
Қазір мектеп ауласындағы аумағы 200 шаршы метр болатын жылыжайдың іші ғажайыпқа толы. Мұнда не жоқ дейсіз, тропикалық жемістер мен өсімдіктердің сан түрі жайқалып тұр.
– Біз биыл осы бақтан жеміс жинадық. Енді 3-4 айдан кейін тағы да жеміс береді. Мысалы банан ағашының бір түбінен 30-40 банан жемісін алдық, – дейді мектеп оқушысы Г.Атем. Ал, оқушы Бекзат Әбдусәлиев болса болашақта ғалым боламын дейді. «Өсімдіктерді зерттейтін ғалым болуды армандаймын. Әсіресе, тропикалық өсімдіктер қатты қызықтырады. Қазір оқушылар бананның қалай гүлдейтінін, лимон мен ананасты және апельсинді қалай күтіп, баптау керектігін жақсы біледі. Соның арқасында биылғы жыл жемісті болды»,– дейді жас бағбандар. Қазір олар өз тәжірибелерін одан сайын жетілдіріп жатыр.
– Өз тәжірибеміздің жемісті болғанына қуаныштымыз. Біздің жас бағбандарымыз алдына үлкен мақсат қойып отыр. Енді біз цитрустық өсімдіктерді өз бақшамызда өсіріп, оны көбейте аламыз. Біз болашақта тропикалық жемістерді өсіріп, одан мол өнім алуға болатынын дәлелдегіміз келеді, – дейді биология пәнінің мұғалімі Жансұлу Ерубаева.
Мектеп асханасының аспаздары енді жеміс-жидек пен көкөніс сатып алу үшін базарға бармайды. Барлығы өздерінің жылыжайында жайқалып тұр. Сондай-ақ Америка мен Голландияда өсетін гүлдердің түр-түрін осы жерден кездестіресіз. Бұл мектеп балаларды бағбандыққа үйретіп қана қоймай, еңбекке баулиды. Мұғалімдер де бұл мектепті бітіріп шыққан балалар табиғатқа зиян келтірмейтініне сенімді.
