2024 жылы елімізде «UILI BOLAIYQ» қайырымдылық қоры ашылды. Қор қарапайым халыққа үйлі болуға көмек береді. Сонымен қатар жиі қайырымдылық акцияларын ұйымдастырып отырады. Халықтың арасында мұқтаж жандар аз емес. Бүгінгі күні қарапайым қара нан таппай жүрген азаматтар жетерлік. Сол азаматтарға кішкене болсын көмек қолын созу мақсатында жаңа жобалар іске асырылуда. UILI BOLAIYQ – бұл үй және көлік алуды жеңілдету жолдарын ұсынатын, қаржылай көмек көрсететін, әлеуметтік кафе мен дүкен арқылы жағдайы төмен адамдарға қолдау көрсететін қоғамдық қайырымдылық қоры. Мақсаты – мұқтаж жандарға көмек көрсету, қоғамға ізгілік пен мейірімділік тарату. Қайырымдылық қордың құрылтайшысы Сұңғат Байғонмен жүздесіп, сұхбат алу мүмкіндігі туды.
– «UILI BOLAIYQ» қайырымдылық жобасы жөнінде ақпарат беріп кетсеңіз. Жоба идеясы қалай туды? Қазіргі таңда қанша адам баспаналы болды?
– 2024 жылы 27 наурыздан бастап іске қосылды. Міне, 1 жыл болды. Осы уақытқа дейін қанша кооперативтерге барып, ақша салдым. Соңында не үй жоқ, не ақша жоқ. Кейін осы жүйені зерттей бастадым, банк жүйесін зерттедім. Осылайша халыққа тиімді жоба ұйымдастыруды қолға алдық. Біз басқа қайырымдылық қорлары секілді үйді тегін бермейміз, пайызсыз бөліп төлеуге береміз. Мысалы, 10 миллион алса, пайызсыз 10 миллион қайтарады. Банктерден ипотекалық несиелар алатын болсақ, қосылатын пайыз мөлшері жоғары, бұл халыққа тиімсіз. Статистикаға сүйенсек, Алматы қаласында 44000 адам үйдің кезегінде тұр, жалпы Қазақстан бойынша 5 миллион адам кезекте тұр. Осы мәселелерді ескере отырып, жобаны ұйымдастырдық. Ашылғанымызға бір жылдың шамасы болғандықтан, әзірге 800 адам тіркелді. Оның ішінде 8 отбасы баспаналы болды. Меніңше, бұл – жақсы көрсеткіш. Қазіргі уақытта нәтижеге жұмыс жасап жатырмыз. Жиналған сома бойынша кезек-кезек үйін алып берудеміз.
– Халық үшін өте тиімді жоба екен. Қайырымдылық қорларыңыздың бастамасымен жыл басында алғаш рет әлеуметтік дәмхана ашылғанынан хабардармыз. Осы дәмхана туралы айтып берсеңіз.
– Дәмхананың ашылғанына 3-4 ай болып қалды. Бұл негізінен стартап жоба. Әлеуметтік осал топтарға таңғы сағат 8-ден сағат 10-ға дейін күнде таңғы ас тегін. Бұл топтарға жағдайы жоқ отбасылар, көше сыпыратын, тазалайтын азаматтар кіреді. Қыстыгүні суық, мысалы ол кісілердің қаншасы таңертеңнен күннің суығында, қарда далада жүреді. Суық күнде адам шай ішсе де жылынып қалады. Бізге күнде таңғы асқа келіп отырады. Одан кейін әрбір жұма сайын сағат түскі 12-ден 3-ке дейін түскі ас тегін таратылады. Қазіргі таңда шаһарда 2 жерде ашылған. Алдағы уақытта басқа да қалаларда ашу ойымызда бар.
– Қайырымдылыққа қаражатты қайдан аласыздар, демеушілеріңіз бар ма? Қайырымдылықпен қатар азаматтарды жұмыспен қамтып отырғандарыңыз да мәлім. Қарамағыңызда қанша жан жұмыс жасайды?
– Негізінен басым бөлігіне өзіміз қаражат бөлеміз. «Таңғы асты мен төлеп кетейін. Ауызашардың ақысын мен төлейін» деп қаржы бөлетін еріктілер де бар. Жасырын садақа, жария садақа бар. Сол садақаларын бізге беріп кететін азаматтар да кездеседі. Көмектесем деген жандарға әрдайым есігіміз ашық. Қазіргі таңда 8 қалада кеңсеміз бар. Әр кеңседе 2 адамнан жұмыс жасайды және осы жақтағы жұмысшылар бар, шамамен 20-25 адамдай қол астымызда жұмыс жасайды.
– Білуімше, қайырымдылық іс-шараларына белсене қатысасыздар. Одан басқа тағы қандай жоспарларыңыз бар?
– Қолдан келгенше қайырымдылық іс-шараларын жасаймыз. Өткен жолы қарттар үйіне бардық. Басшыларынан не керегін сұрастырып, шаш алу бөлмесі керек екенін білдік. Қарттар үйіне шаш алатын бөлме жасап бердік. Содан кейін 1 балалар үйіне бардық. Дәл солай не керектігін сұрастырдық, балаларға тек қана ойыншық керек екенін білдік. Өздерінің сұраныстарымен бүлдіршіндерге ойыншықтарын апарып бердік. Сонымен қатар 21 наурыз күні қайырымдылық акциясын жасадық. Балалардың қолдан жасаған қолөнер туындыларын біз аукционға апарып сатып, түскен қаражатты балалардың өздеріне бердік. Тағы 5 адамға мүгедектерге арналған арба тарту еттік. Мүгедектер ұйымдары қазіргі таңда көп екен, соның ішінде 2 ұйымның 5 адамына бердік. Толығымен қайырымдылық қорымыздың атынан қаржы бөліп, көмек бердік.
– Көмекке зәру жандар елімізде аз емес. Қайырымдылық шараларын қаншалықты жиі жасайсыздар?
– Біз уақытқа қарамаймыз. Қолдан келгенше жиі көмек беруге тырысамыз. Атырау қаласында бір бала ауырып жатты, еміне қаржылай көмектестік. Жезқазған қаласында да ауырып жатқан бір балаға көмек қолын создық. Былтыр Құлсарыны су басқанда қолдан келгенше қаржылай көмек көрсеттік. Азды-көпті көмек қолып созуға тырысамыз.
– Болашаққа қандай жоспарларының бар? Жақын арадан іске асырсам деген жобаларыңыз бар ма?
– Әлеуметтік дүкен ашу ойымызда бар. Нарықтағы бағаға қарағанда тауарлар арзан болады. Өндірушілердің өнімдерін біздің дүкеннен сатып алуға болады. Тауардың үстіне 5-10 теңге қосу арқылы, көтерме сауда орталықтарынан да арзан бағада ұсыну жоспарлануда. Қазіргі таңда акционерлерді жинақтар жатырмыз. Сол дүкеніміздің акцияларын сатып болғаннан кейін, 1-2 айдың көлемінде ашылсақ деген ниеттеміз. Қазақстанның әрбір қаласынан ашқымыз келеді. Мысалы Алматы қаласы үлкен болғандықтан, бұйырса 20 дүкен ашылады.
– Әлеуметтік дүкендеріңізде тағы қандай жеңілдіктер қарастырылады?
– Бізде тұрақты сатып алушыларға жеңілдік картасы болады. 15-30 пайыз жеңілдік карталары беріледі. Күнде дүкеннен барып тауар алсаңыздар, 15-30 пайыз жеңілдік бере алады. Бірақ 6 айда бір рет толтырып тұру керек болады.
– Жобаларды ұйымдастыруға, нарықты зерттеуге қанша уақыт кетеді?
– Өзіміздің арнайы топ бар, сол топтың ішінде ақылдасып, есептеп, нарықты зерттейміз. Мысалы осы жобамыз бұрын-соңды Қазақстанда болмаған, Америкада бар екен. Ол жақта осы жүйе бойынша жұмыс жасалып жатыр, енді біз оны елімізге алып келсек деген жоспарымыз бар. Қазіргі таңда жүйесі жасалып жатыр, акцияларымызды сатып жатырмыз. Біздің ұйымда маркетологтар мен бизнесмендер бар, олардың әрқайсынан ақыл-кеңес сұраймыз. Ортаға салып, толықтай зерттеп барып жүзеге асырамыз. Кейде 1 ай немесе 1 жылға дейін ізденіс жұмыстарын жүргіземіз. Мысалы үй алу жобасын біз 4 жыл зерттедік. Ал, әлеуметтік дүкенді 1 жыл зерттеп, қазір қолға алып жатырмыз.
– Әңгімеңізге рақмет! Атқарып жатқан жұмыстарыңыз халықтың игілігіне іске ассын. Қарапайым азаматтардың жағдайын ойлайтын сіздей азаматтар көп болсын!
Сұхбаттасқан – Қарлығаш ШАҢҒАРАҚШЫ
