Мемлекет басшысы Қасым-Жомарт Тоқаев Қазақстан Республикасының тұтастығы мен тыныштығы үшін гарант тұлға! Ел өмірінде, көршілес елдерде түрлі жиындар мен форумдар, саммиттер өтіп жатады. Сол жерлерде әлемдік журналистерге сұхбат беріп, қазақ елінің болашағы мен келешегіне қатысты түрлі сауалдарға да нақты жауап беріп жатады. Кейде шетелдік және ұлттық телеарналарға сұхбаттар беріп, газет-журналдарға мақалалар жазады.
Күні кеше, нақты айтсақ, 27 қараша күні Қазақ елінің Астанасына Ресей Президенті Владимир Путин келді. Мемлекет басшысы Қасым-Жомарт Тоқаев Қазақстанға мемлекеттік сапармен келген Ресей Федерациясының Президенті Владимир Путинді елорда әуежайынан қарсы алды.
Қазақстан мен Ресейдің қарым-қатынасы берік әрі мызғымас достықтың шынайы көрінісі екені даусыз. Қазақстан мен Ресей арасындағы мәдени-гуманитарлық байланыс қарқынды дамып келе жатқан мемлекеттер. Бұл туралы Қазақстан Президенті Қасым-Жомарт Тоқаев «Известия» газетіне жарияланған мақаласында жазды.
«Владимир Путин екеуміз үнемі хабарласып тұрамыз», – деп жазады Тоқаев, бұл қатынастың тек саяси емес, іскерлік тұрғыда да бірізді екенін көрсетіп. Соңғы бір жыл ішінде төрт мәрте толық форматтағы кездесу өткізілген. Мұндай тығыз қарым-қатынас екі ел арасындағы шекаралас ынтымақтастық пен жаһандық тұрақсыздық кезеңіндегі ортақ жауапкершілікті айшықтайды.
Мақалада Қазақстан мен Ресейдің экономикалық ықпалдастығының өрлеуі туралы нақты деректер келтірілген. Қазақстанда жұмыс істеп жатқан ресейлік 23 мың компанияның 4 мыңы соңғы жылда ғана ашылған. Екіжақты инвестиция көлемі 2023 жылы әр тараптан 3 миллиард доллардан асып түсті. Ең қызығы, бұл ынтымақтастық тек дәстүрлі энергетика немесе өнеркәсіп салаларында емес, көлік-логистика мен ауылшаруашылығында да қарқынды дамып келеді.
«Бұл өз кезегінде Еуразия экономикалық одағының тиімділігін дәлелдейді» деп, дипломатиялық ойынның нүктесін қойды Тоқаев. Бұл сапарды «мәңгі достық пен тату көршілік символы» дей отырып, біздің еліміз екі ел арасындағы шекараның ұзындығы мен ондағы 32 миллион адамның өміріне аса жауапкершілікпен қарап отырғанын байқатады. Ресейдің кез келген сөз бен қимылды өзіне қатысты қабылдап, соған бір жеңілтек реакция бере бастағанын ескерген еліміз, осы екі тарап байланысындағы жауапты, салмақты тарапқа айналып келеді. Ресей бізге емес, біз Ресейге басу айтатын болдық.
Владимир Путин өз жауабын «Қазправдаға» жазып жіберіпті. «Екіжақты тауар айналымы өткен жылы жаңа рекорд орнатып, 28 миллиард доллардан асты. Жыл сайын Қазақстан экономикасына ресейлік инвестициялар да артып келеді – бүгінгі күні олардың көлемі шамамен 13 миллиард долларды құрайды. Республика аумағында ресейлік капиталдың қатысы бар 23 мыңнан астам кәсіпорын жұмыс істейді. Екі елдің компаниялары өнеркәсіптік кооперация және жоғары технологиялар саласында ірі бірлескен жобаларды жүзеге асыруда, толық индустриялық циклмен жаңа өндірістерді жолға қоюда. Бұл экономикаларды кешенді жаңғыртуға және Ресей мен Қазақстанның технологиялық егемендігін нығайтуға ықпал етеді», – деп пайымдады Путин.
Оның жазуынша, біздің елдер мұнай-газ секторында да конструктивті түрде ынтымақтасуда. Каспий құбыр консорциумының қызметі арқасында Қазақстан мұнайының шетел нарықтарына экспортының 80 пайыздан астамы Ресей аумағы мен Қара теңіздегі ресейлік порттық инфрақұрылым арқылы жүзеге асырылады. Екі елдің энергетикалық компаниялары көмірсутегі кен орындарын бірлесе игеруде, энергетикалық ресурстарды өңдеуде және құбыр жүйесін кеңейтуде бірлесіп жұмыс істеп келеді.
«Былтыр елімізде «орыс маусымы» деген атаумен ауқымды іс-шаралар ұйымдастырылды. Ал биыл Мәскеуде Астананың мәдениет күндері өтті. Ондағы ең негізгі оқиға ретінде «Абай» операсының Үлкен театрда қойылғанын айтуға болады. Сондай-ақ, Ресейдің басты мұражайлары – Третьяков галереясында және Эрмитажда Қазақстанның көрмесі ашылады», – деді Қасым-Жомарт Тоқаев.
Мақаланың тағы бір тұсында «Ал, Астанадағы Дүниежүзілік көшпенділер ойындарында Ресей спортшылары өнер көрсетті. Бұл – мәдени-гуманитарлық қарым-қатынасты жаңа форматта өрбіту маңызды екенінің белгісі. Біз осы игі дәстүрді жалғастырып, Ресей бастамасымен қолға алынған «Болашақ ойындарының» кезекті сайысын 2026 жылы Қазақстанда өткіземіз. Білім саласындағы ынтымақтастықтың да мазмұны толыға түсті. Біз еліміздің оңтүстік аймақтарында Ресей мектептерін ашуды жоспарлап отырмыз. Сол сияқты бізбен іргелес жатқан Ресей қалаларында Қазақстан мектептері ашылады деп сенеміз», – деді Президент.
Биыл Еуразия экономикалық одағын құру туралы шартқа 10 жыл толды.
Ресей Президенті Владимир Владимирович Путиннің Қазақстанға мемлекеттік сапары қазақ-орыс қатынасының тарихындағы аса маңызды оқиғаның бірі болғаны анық. Жоғары мемлекетаралық мәртебесі бар бұл сапар елдеріміз арасындағы стратегиялық серіктестіктің мән-маңызы айрықша екенін көрсетеді.
