«Ауыл аманаты – ел аманаты» атты «АMANAT» партиясы, ҚР Ауыл шаруашылығы министрлігі, ҚР Оқу-ағарту министрлігі, ҚР Денсаулық сақтау министрлігі, ҚР Еңбек және халықты әлеуметтік қорғау министрлігі, «Ардагерлер кеңесі» РҚБ, «ЕлАна» қоғамдық, әлеуметтік-танымдық сайты, «Qazaqstan dauiri» газеті, «Мөлдір бұлақ» журналының бірлескен экспедициясы Абай және Батыс Қазақстан облыстарында
«Qazaqstan dauiri» ЖШС-ның Бас директоры Сәуле Мешітбайқызының дәстүрлі «Ауыл аманаты – ел аманаты» экспедициясы аясындағы Батыс Қазақстан облысындағы күзгі жұмыс сапары Теректі ауданында түйінделді.
«Жаңа үйді өз ауламыздан салып берді»
Тоқсан жылдық тарихы бар ауданға қарасты Подстепный ауылына ат басын тіреген ел анасын аудан әкімі Әлия Мұханбетжанова бастаған теректіліктер үлкен құрметпен қарсылады. Көктемгі қарғын судың кесірінен аудан халқының көп бөлігі қоныстанған бұл ауылда 595 үй суға кеткен екен. Аудан басшысы елордалық журналисті табиғи апаттан зардап шеккен отбасыларға берілген су жаңа тұрғын үйлерге бастап барды.
Осы ауылда қоныстанғанына алпыс жылдан асқан 86 жастағы Күләш Мұханбетжанова есімді тұрғын да үйі суға кеткендердің бірі. Жасы ұлғайса да тың көрінетін апамыз қонақтарды ерекше қонақжайлықпен өзі күтіп алды.
– Қолымда кіші қызым мен екі жиенім бар. Үйіміз суға кетті. Қызым өлшемелі тауарлар сататын еді, сол заттарының барлығы бүлінді. Ал мына жаңа үйді үш ай жарым уақыттың ішінде тұрғызып берді. Осында 30 тамызда көшіп келдік. Үй жылы, барлығы да өзіміздің көңілімізден шықты. Көгілдір отын, жарық, су – бәрі бар. Осындай қамқорлықтары үшін Мемлекет басшысына, облыс және аудан әкімдеріне, Подстепное ауылдық округінің әкіміне, ел-жұртыма айтар аналық алғысым шексіз, – деді ағынан жарылған кейуана. Айтуынша, өзі отыз жыл сауда саласында еңбек етіп, зейнеткерлікке шығыпты. Суға кеткен баспаналарының жер телімі 17 сотық болған екен. Жаңа үйді өздерінің сол аулаларынан салып берген. 86 жастағы ана үйінің ауласына өз қолымен бақша өнімдерін отырғызатынын айтып, оны да көрсетті. Еңбекқор жанның осындай өнегелі болмысына риза болған Сәуле Мешітбайқызы Күләш ападан бата сұрады. Сондай-ақ өзінің Батыс Қазақстан өңіріне жиі келіп тұратынын айтып, көктемгі тасқын күндерінде елі үшін алаңдағанын жеткізді.
«Қарғын су біраз әбігерге салды»
Келесі жаңа үйде бізді Мерует Ғаббасова есімді жасы жетпіске жеткен тағы бір ардақты ана қарсы алды. Бұл үйде ол кісінің күйеу баласы мен қызы Дәулет Серікқалиев пен Айнагүл Ғаббасова тұрады екен. 2011 жылы өз еңбектерімен бес бөлмелі даңғарадай үй тұрғызып, қоныс тойын тойлаған жас отбасының баспаналары да көктемде тілсіз жаудың құрсауында қалыпты. Жер телімі Мерует апайдың атында болғандықтан, әне-міне деп жүріп, үйді өз аттарына қайта ресімдеуге де уақыт таппаған сыңайлы. Негізінде ұлымен тұратын бес баланың анасы Мерует апайдың сол күні бұл жерде жүруінің бір себебі де осы екен.
– Жалпы биылғы жыл күллі қазақ елі үшін қиын болды. Соның ішінде біздің ауылдастарымыз да бар. Сәуір айында аяқ астынан келген қарғын су біраз әбігерге түсірді. Күйеу балам мен қызым үйлері суға кеткенде, ешқандай дүние-мүліктерін алып шыға алмады. Содан соң бұлар облыс орталығындағы қызымның үйіне барып, екі отбасы болып уақытша бірге тұрды. Енді, міне, қыркүйек айының басында көңілдегі күмәндары сейіліп, жаңа үйлі болды, – деген Мерует апай үш балалы жас отбасыға берілген жаңа баспананың құжаттарын енді өз аттарына аударып беретінін айтты.
Бұл кісі Теректі ауданында 42 жыл саз мектептерінің директоры болып қызмет атқарып, зейнеткерлікке шыққан. Ұстаз десе, өнер иелерін тәрбиелеген педагог десе елең ете түсетін Сәуле апай мен Мерует анамыздың әңгімесі де жараса кетті. Мерует Каздукқызы білім саласында еңбек еткен жылдарында қазақ ұлттық өнерін дәріптеуге үлес қосқан. Өзі басқарған саз мектебінің шәкірттері халықаралық байқауларда ұлттық өнерді насихаттап, қазақ елін шетелдерге танытқан.
Жаңадан бой көтерген екі үйдегі ақ жаулықты аналар да тілсіз жаудан зардап шеккен тұрғындарды дер кезінде баспанамен қамтамасыз еткен Мемлекет басшысының саясатына және тапсырманы уақытылы орындаған жергілікті әкімдер мен атқамінер азаматтарға ризашылықтарын білдірді. Үрейлі күндерді еске түсіріп, сондай ауыр сәттердің артта қалғанына, адам шығыны болмағанына шүкіршілік етті. Өңірімізде мемлекет тарапынан аз уақытта көмек көрсетіліп, тұрғын үй құрылыстары қарқынды түрде жүргізілгені белгілі. Есесіне, қысқы суыққа қалмай, жылы үйлерге қоныстанған тұрғындар дән риза. Үш бөлмелі, 80 шаршы метрді алып жатқан тұрғын үйлердің барлығы бірдей типтік жобамен салынған. Сәуле Мешітбайқызы жаңа қоныс иелерін құттықтап, ақжарма тілегін жаудырды.
Мәдениет үйіндегі кездесу
Ел-жұрттың осындай шынайы тілегіне масаттанған күйде Подстепный ауылындағы Мәдениет үйін бетке алып, жүріп кеттік. Мұнда ауыл тұрғындары, мұғалімдер, мәдениет саласының қызметкерлері, жастар, аудандық және ауылдық әкімдік өкілдері қатысқан кездесу өтті. Жиынды аудан әкімі Әлия Биғазықызы өзі жүргізіп, облысымызға келген қонақты таныстырды. Зал лық толы болмаса да, қоғамдағы өзекті мәселелерді қалам ұшына іліктіріп жүрген ел анасының әңгімесін жиналғандар ұйып тыңдады. «Qazaqstan dauiri» ЖШС-ның Бас директоры, қоғам қайраткері Сәуле Мешітбайқызы газетіміздің және «ЕлАна» қоғамдық, әлеуметтік-танымдық сайтының «AMANAT» партиясымен және бірнеше құзырлы министрліктермен бірге жүзеге асырылып келе жатқан «Ауыл аманаты – ел аманаты» экспедициясы туралы айтып өтті. Сонымен қатар ұрпақтың болашағына да алаңдайтынын айтып, жас буынның болашағына балта шабатын зиянды әрекеттерге бірлесе тосқауыл қоюға үндеді. Танымал журналист қазақ баспасөзінің бүгінгі ахуалы, педагогтердің мәртебесі, әлеуметтік желілердің пайдасы мен зияны, кітап оқудан алшақтап кеткен ұрпақ жайында да баяндады.
Кездесуге қатысқан подстепныйлықтар айтылған мәселелерге бей-жай қарамай, ой-пікірлерімен бөлісті. Әсіресе, жастар арасындағы сауатсыздық, ел ішін бүйірден қысқан қымбатшылық, қазақ баспасөзінің тағдыры туралы әңгіме қозғалды. Аудандағы білім, медицина, ветеринария салаларының тікелей облыстағы құзырлы мекемелерге бағынышты екені айтылды. Сол себепті аудан әкімдіктері бұл мекемелерге кейде сөздерін өткізе алмайтыны да ақиқат. Жиынға қатысқандар ел аманатын, ұрпақ аманатын арқалап жүрген Сәуле Мешітбайқызына ізгі тілектерін арнады. Подстепный жалпы орта білім беретін мектебінің педагогтері кездесуден рухани нәр алғандарын жасырмады.
Өз сөзінде аудан басшысы Ә.Мұханбетжанова баспасөзге жазылым мәселесі күрделі екенін мәлімдеді. Сәуле Мешітбайқызы жуырда батыс өңірге жұмыс сапарымен келген мемлекеттік кеңесші Ерлан Кариннің «мұғалімдер газет оқуы керек» деген сөзін тағы бір мәрте еске салды. «Расымен де, қазақ баспасөзі өлместің күйін кешпеуі қажет» деді осы мәселеге баса алаңдайтын газет басшысы.
Кездесу соңында сөз алған аудандық ішкі саясат бөлімінің басшысы Жандос Сұңғатов бұл рухани жүздесу жерлестеріне үлкен ой салғанына сенім білдірді. Сондай-ақ жергілікті суретші Бекжан Жұмабаевтың «Аманат» атты туындысын сыйлау арқылы ел аманатын арқалаған газет ұжымының жұмысына сәттілік тіледі.
Кездесу барысындағы Подстепный ауылы тұрғындарының ой-пікірлері:
Мерует ҒАББАСОВА, ауыл тұрғыны:
– Биыл облыс тұрғындары тасқын судан қиындық көрді. Бір қуантарлығы, баспанасы су астында қалған жерлестеріміздің барлығы жаңа үйге қол жеткізді. Бұл – Мемлекет басшысының, қала берді жергілікті әкімдердің қамқорлығы. Аудан, ауыл әкімдері сондай қиын кездері тынымсыз жұмыстанды. Оған бәріміз де куә болдық. Сіз де Мемлекет басшысының Жолдауы аясында мақсаты зор экспедиция жариялап, елдің хал-ахуалын білмек ниетпен өңірімізге келіп жатырсыз. Сіз тілге тиек мәселелердің барлығы орынды. Әсіресе, адам өзінің жан-дүниесін байыту үшін газет-журнал оқуы керек. Соның ішінде балалар басылымының да орны бөлек.
Ажар НҰРАЛЫ, ауыл тұрғыны:
– Қай ауылға барсаңыз да, олардың айтатын үлкен проблемасы – қымбатшылық. Бір баланың өзін күзде мектепке дайындаудың өзі үлкен қаражатты талап етеді. Сондай-ақ ауылымызда медицина мамандары жетіспейді. Облыс орталығына барып, ақылы дәрігерлерді жағалаймыз. Ай сайынғы төлеп жатқан міндетті әлеуметтік медициналық сақтандыру жарнасының да пайдасын көріп жатқан жоқпыз. Интернетке тәуелділік мәселесін де дұрыс қозғап отырсыз. Зейнеп Ахметованың бір керемет сөзі бар «Интернет тек ақпарат береді, ал білімді беретін – кітап» деген. Мұғалімдер өзгенің баласын тәрбиелеймін деп жүріп, көп нәрсеге уақыттары бола бермейді. Әйел адамды отбасы-ошақ қасында үйдің тірлігі күтіп тұрады. Сондықтан үйлерінде өз баласына журнал, кітап оқып беруге олардың да уақыттары болмайтыны белгілі.
Ақтілек ӘЛІБЕКҰЛЫ, аудандық «Теректі жаңалығы» газетінің тілшісі:
– Ата-әжеміз газет-журналдың әр нөмірін үзбей оқитын еді. Шамның жарығымен газет оқитын үлкендерді көріп өскен ұрпақпыз. Сәуле Мешітбайқызының айтуы орынды. Қазіргі қазақ баспасөзінің тағдыры қыл үстінде тұрғаны белгілі. Жазылым аз. Біз құралпы жастардың газет оқымайтыны да рас.
Гүлім МЫРЗАХАН, Подстепное ауылдық округінің жастармен жұмыс жөніндегі маманы: – Біз «Мөлдір бұлақ», «Айгөлек» балалар журналдарын оқып өстік. Газет-журнал оқыған адамның тіл байлығы, сөздік қоры дамиды. Қазіргі уақытта жастарға түрлі бағдарламаларды түсіндіреміз, жұмысқа орналасу бойынша түрлі ақпараттар береміз. Кейін олар жұмысқа орналасып жатады. Сол кезде жастардың көп жағдайда сауатсыздығы байқалады. Осындай жағдайлар бізді де алаңдатады.
