Отбасы – адамның алғашқы тәрбиесін алатын алтын ұясы. Әрбір жан үшін отбасы – мейірім мен жылулықтың, қамқорлық пен сүйіспеншіліктің қайнар көзі.
Менің отбасым – менің мақтанышым. Үйімізде біз – үш қызбыз. Бізді өмірдің қиындықтарынан қорғап, бағыт-бағдар беріп отырған асқар тауымыз – әкеміз Алтай. Әкеміз – отбасының тірегі, ақылшысы әрі қамқоршысы. Ол бізге еңбекқорлықты, адалдықты, табандылықты үйретеді. Әкеміздің әрбір айтқан ақылы – өмірімізге бағыт беретін шамшырақ.
Анамыз Мөлдір – біздің жүрегіміздің жылуы, отбасының берекесі. Ол мейірімділігімен бізге өмірдің ең құнды сабақтарын үйретеді. Анамның шуағы әрқашан бізді жылытып, қолдау көрсетіп тұрады. Қазақта «Ана – үйдің берекесі, әке – үйдің тірегі» деген дана сөз бекер айтылмаған.
Отбасымыздың тағы бір ардақты мүшесі – Тұрсынкүл әжеміз. Әжеміз қазақ ауылында тұрады, ол – нағыз даналықтың үлгісі. Әжеміз бізге ұлттық салт-дәстүрді, әдет-ғұрыпты үйретіп, тәрбиемізге ерекше көңіл бөледі. Әжеміздің айтқан ертегілері мен ақыл-кеңестері жүрегімізде мәңгі сақталады. Қазақта «Атаның баласы болма, адамның баласы бол» деген нақыл сөз бар, осы сөздің мағынасын бізге алғаш түсіндірген де әжеміз.
Үш қыз болғандықтан, біз үйде үнемі бір-бірімізбен сыр бөлісіп, ойымызды еркін айтып отырамыз. Арамыздағы мейірімділік, сыйластық отбасымыздың қуатын арттырып, шаңырағымызды шаттыққа бөлейді.
Отбасы – адам өміріндегі ең қымбат қазына. Отбасындағы жылулық, сүйіспеншілік, мейірім адам жүрегінде мәңгі сақталатын құндылықтар. Отбасын қадірлеу, ата-ананы құрметтеу, бауырлармен тату болу – әрбір адамның басты парызы. Отбасы – бақыттың бастауы!
Толғанай АЛТАЙҚЫЗЫ,
Жамбыл облысы, Меркі ауданы
Жамбыл ауылы
Ақкөз Қосанұлы атындағы №18 ЖББМ-нің
11 «Ә» сынып оқушысы
