Қырғыздың ақ иық Алатауынан бастау алып, Бетпақдалаға дейін баратын Шу өзені ежелден көршілес жатқан екі елге теңдей құтты қоныс болып келеді. Өзеннің жоғарғы ағысының қызығын қырғыздар көрсе, орта және төменгі жағы қазақ халқының игілігіне жарап тұр. Осы трансшекаралық өзеннің бойында тіршілігін тіктеп, нәпақасын тауып отырған өлкелердің бірі – Шу ауданы.
Жамбыл облысының халқы көп, экономикасы тұрақты, ауыл шаруашылығы дамыған аудандарының бірі саналатын Шу ауданы темір жол саласымен де елге етене жақын, ерекше таныс. Өйткені Шу станциясы еліміздегі ең үлкен тораптық темір жол стансаларының бірі де бірегейі саналады. «Тоғыз жолдың торабында» орналасқан деп дәл осы Шу қаласына қарата айтылса керек.
Шу өңірінің еліміздің тарихында аса зор маңызға ие болуы XV ғасырдың орта тұсында Қазақ хандығының, яғни ұлттық мемлекеттігіміздің іргетасының қалану кезеңіне тұспа-тұс келеді. 1465-1466 жылдар қазақ хандығының құрылған кезі ретінде қабылданған. Ал оның туы тігілген жері Шу өзені бойындағы «Қозыбасы» аталатын шоқы еді. Шу өңірі қазақ елінің ұлттық мемлекеттігінің бесігі ғана емес, сондай-ақ қазақ бірлестігінің жаңа сапаға, яғни ұлттық тұтастыққа өтуіне ұйытқы болған аймақ деп айтсақ та артық болмас.
