Тараз жауһарлары бүкіл әлем назарын аударатын таңғажайыптар

0
460

Сынаптай сырғыған өмірге өлшем жасау мүмкін емес. Әрбір сәттің, әрбір мезеттің өзіндік құны мен құндылығы болады. Алайда уақыт бәріне таразы. Кей-кезде адам баласының қолынан туған туындылар талайды таңғалдырып ғана қоймай, тарихтың ақтаңдақ беттерінде ақиқатпен таңбаланады. Жамбыл облысының әкімі Асқар Мырзахметовтің өңірге жасап жатқан өрелі істері жұрттың жадында, ұрпақтың санасында сақталары даусыз. Аз уақыттың ішінде аймақ басшысы Таразды тотыдай түрлендіріп, дәуірлер дастанында жазылардай дүниелер жасады. Бұған дейін саябақтар мен скверлер жаңаша көрікке енсе, сұрқы қашқан көшелер мен ұмыт болған жағажайлар да жаңаша әрленді. Таңдай қақтыратын тамаша-тамаша кешендер, ескерткіштер бой көтерді. Жамбыл облысының 80 жылдық мерейтойына бой көтерген нысандар да өшкенімізді жаңғыртып, тарихымызды қайта тірілткені ақиқат. Оны біз айтпасақ та қалың бұқара көзбен көріп, алыстан ат арытып тойға келген қонақтар оң бағасын берді.
Осы орайда халықаралық «Қазақстан Дәуірі» газеті жыл өткен сайын жаңарып, жаңаша кейіпке еніп келе жатқан көне шаһар Тараз бен жасарған Жамбыл өңіріне арнап «Жамбыл жансарайы» арнаулы бетін оқырманға жолдап отыр. Жаңа айдарлы беттің тұздығына осы жолы – Жамбыл облысының 80 жылдығына тарту етілген теңдессіз,һәм тарихи жәдігерлерге арналып отыр. Ендеше, мархаббат…

Тоқпановтың
таутұлғалы тұғыры

Жамбыл облысының 80 жылдық мерейтойы қазақтың тұңғыш кәсіби режиссері, Халық әртісі Асқар Тоқпановтың ескерткішінің ашылуымен басталды. Облыстық қазақ драма театрының негізін қалап, ондағы шығармашылық ұжымның кәсіби біліктілігін жетілдіруге өз қолтаңбасын қалдырған режиссердің еңселі мүсіні өнер ордасының алдына қойылды.
Салтанатты шараға КСРО және Қазақстанның Халық әртісі, Қазақстанның Еңбек Ері Асанәлі Әшімов пен Қазақстан Театр қайраткерлері одағының төрағасы, Қазақстанның Халық әртісі Тұңғышбай Жаманқұлов бастаған еліміздің түкпір-түкпірінен келген мәдениет пен өнер майталмандары, зиялы қауым өкілдері мен Асқар Тоқпановтың ұрпақтары қатысты. Еңселі ескерткіштің лентасын Асанәлі Әшімовпен Тұңғышбай Жаманқұлов, сондай-ақ Есмұхан Обаев қиды. Мұнан соң ескертікшке аймақ жұртшылығы атынан өңір басшысы Асқар Мырзахметов пен облыстық мәслихаттың хатшысы Бағлан Қарашолақов гүл шоқтарын қойды. Ескерткіштің ашылуында сөз алған тұлғалар Асқар Тоқпанов туралы естеліктері мен тағылымды ойларын ортаға салды.
Мұнан соң А.Тоқпановтың өмірі мен шығармашылығы жөніндегі «Тоқпанов тұлғасы» атты естелік кітаптың тұсаукесер рәсімі өтті. Аталған кітаптың лентасын жазушы-драматург Елен Әлімжан мен ҚР Еңбек сіңірген қайраткері, Т.Жүргенов атындағы Өнер Академиясының профессоры Аман Құлыбаев қиды.
Шындығын айту керек, театрға тұлғаның есімін беру өнерсүйер қауымның көптен бергі арман-тілегі болатын.
Облыс әкімі Асқар Исабекұлы осы мәселені Үкімет, Мәдениет министрлігі деңгейінде көтеріп, игі бастама өз шешімін тапты.

«Екі Кенен тумайды, Алатауға ексең де…»

Дүбірлі думан аясында жақұттай жырымен, әуезді әнімен ерекшеленіп, бітімі бөлек болмысын халқына танытып кеткен дүлдүл Кенен Әзірбаевтың да ескерткіші ашылды. «Баласағұн» орталық концерт залының алдынан бой көтерген жаңа ескерткішті ашу құрметіне облысымыздың Құрметті азаматы Төле Сүгірбаев, Қазақстанның еңбек сіңірген мәдениет қызметкері, күйші-композитор Әбдімомын Желдібаев, К.Әзірбаевтың ұрпағы Мұрат Кененов ие болды. Облыс әкімі Асқар Мырзахметов пен ҚР Мәдениет және спорт министрі Ақтоты Райымқұлова, белгілі күйші Әбдімомын Желдібаев пен облыстың Құрметті азаматы Төле Сүгірбаев гүл шоғын қойды. Ескерткіштің ашылу салтанатында сөз алған Төле Аманжолұлы жиылған дүйім жұртты қуанышпен құттықтады.
Қазақтың өнерін әлемге танытқан әйгілі ақын, әнші, композитор, Қазақстанның еңбек сіңірген өнер қайраткерінің ескерткіші демеушілер қаражаты есебінен мүсінші Көлжігіт Темірхан дайындаған.Жыр алыбы Жамбылдың жанында жарты ғасыр жүріп, қазақ ауыз әдебиетінің мол мұрасымен қаныққан Кенен атамыздың есімі өткен жылы облыстық филармонияға берілген болатын.
Дастан жанрын жастайынан жырлаған. Қазақ халқының айтыс өнерінің насихатшысы. Қалың халықтың жүрегінен орын алған 150-дей әнді тудырғанКенен Әзірбаевтың туғанына биыл 135 жыл толып отыр.
«Екі Кенен тумайды, Алатауға ексең де…» дегендей жыршының туындылары қайталанбас қазына екенін уақыт та дәлелдеп келеді.

«Әуендер әлемі»,
60 жұлдыз және алып тұлғалар

Мерейтой аясында мәдениет саласының майталмандарына құрметтің белгісі ретінде «Әуендер әлемі» алаңы да ашылды. Мұнда өңірдің ғана емес, өлкеде туып-өсіп, ел абыройын әлемге асқақтатып,халқымыздың сан ғасырлық шежіресі бар саз өнерінің сарынын жалғап жүрген саңлақтардың есімдері отыз тұғыр тасқа ойып тұрып жазылып, биіктігі 6,5 метрді құрайтын ғаламат стелла бой көтерді.
Нысан ықылым замандардан бері туындылары тұла бойға сіңген дала сазының даңқты тұлғасы Ықылас Дүкенұлы атындағы қалалық Мәдениет үйінің маңында орналасқан. Жалпы аумағы 700 шаршы метрден асады. Бұған дейін қараусыз жатқан алаң маңындағы аллея қайта жаңғыртылып, қалпына келтірілген.Бұл еліміздің атын әлемге танытып жүрген әулиеаталық музыка өнері қайраткерлерінің шығармашылығын насихаттап, өнегелі өмір жолын бүгінгі ұрпаққа үлгі ету мақсатында жүзеге асқан жүйелі жұмыстың жарқын нәтижесі. Стелланың айналасындағы отыз тұғыр тасқа бедерленген алпыс жұлдыз белгісіне еліміздің мәдениетіне үлкен үлес қосқан тұлғалар мен өнер жұлдыздарының есімдері өрнектелген. Ал стелланың тұғырына Жамбыл Жабаев, Балуан Шолақ, Ықылас Дүкенұлы, Кенен Әзірбаевтың өнер туралы айтқан өнегелі сөздері қашалып жазылған.

«Даңқты спортшылар» алаңы

Мерейтойға арнап ашылған келесі нысан – «Даңқты спортшылар алаңы» болды. Еліміз спортының арғы-бергі тарихын ақтарсақ саламатты өмір салтын жанына серік етіп қана қоймай, ел мерейін асырған, абыройымызды асқақтатқан жамбылдық саңлақтардың есімі көп аталады. Кәсіби тұрғыдан болмаса да қара күшінің арқасында күрес өнерін жетік меңгеріп, ат құлағында да еркін ойнаған Балуан Шолақ Көкшетау өңірінде өскенімен, Әулиеатадан түлеп-ұшқан тұлға. Міне, осындай жауырыны жер иіскемеген балуан бабасының жолын Мәскеу Олимпиадасында Жақсылық Үшкемпіров жалғады. Серік Қонақбаевқа қарап та талай қазақ баласы бой түзеді. Ермахан, Бақтияр, Болат, Ақжүректердің даңқты жолын армандаған кейінгі буынның алды Олимпиада, Әлем біріншіліктерінде көк туымызды желбірете бастады.
Облыс тарихындағы мерейлі сәтте ел, әлем таныған спортшылардың құрметіне «Тараз–Арена» спорт кешені алдынан алаң ашып, оның ортасында биіктігі 6,5 метрді құрайтын факел орналасқан. Оның екі шетінде травертин және гранит материалынан дайындалған, биіктігі 3 метр, ұзындығы 9 метр болатын 2 құрмет тақтасы қойылған. Құрмет тақтасында Жамбыл өңірінен шыққан даңқты 145 спортшының және 96 еңбегі сіңген жаттықтырушының есімі жазылған.
Алаңның ашылу салтанатына жиналған халықтың қарасы қалың болды, олардың арасында даңқты спортшылар да жүрді. Ал облыс әкімі Асқар Мырзахметов, ҚР Мәдениет және спорт министрі Ақтоты Райымқұлова, Олимпиада чемпионы, Қазақстанның Еңбек Ері Жақсылық Үшкемпіров, Қазақстанға еңбек сіңірген жаттықтырушы Феликс Цой құрметті қонақ ретінде төрден орын алды.

Тарихымыздың алтын діңгегі «Тектұрмас»
еліміздегі
ең алып ескерткіш

Мерейтой аясында ашылған нысандардың ішінде шоқтығы биік, тағлымы терең «Тектұрмас» этно-тарихи кешені де бар. Орта Азияда теңдесі жоқ тарихи кешендегі Әулиеата ескерткішінің ашылу салтанатында алдымен бабалар рухына құран бағышталып, тағзым етілді.
Тарихи кешенді тамашалау Талас өзені арқылы өтетін көпірден басталады. Көпірге кіре беріс жерде екі үлкен стела тұрғызылған: дөңгелек күн тәрізді тастың бірінші бетінде Ұлы Батыс түркі қағандарының таңбасы бедерленсе, екінші бетінде түркі халықтарының наным-сеніміндегі тәңір құсы Самұрық құстың бейнесі көрсетілген.
Көпір аяқталатын жерінің екі жағында түркі халықтарының негізгі айбарлы белгісіне айналған биіктігі 4 метрлік, салмағы 3 тонналық ақ түсті мәрмәр тастан құйылған, түр келбеті қазба жұмыстары кезінде табылған артефакт образы бойынша жасалған екі арыстанның мүсіндік бейнесі орнатылған. Ежелгі мифологияда аңдардың патшасы арыстан өз аумағы мен үйірін қорғайтын, билік пен байлықтың символы болып есептелген.
Осы жерде «Тектұрмас» этно-тарихи кешенінің паспорты жазылған. Бұл аумақ – киелі аумақ. «Тектұрмас» этно-тарихи кешенінің кіре берістен-ақ айбатын арттырып тұрған –ч «Көне Тараз» қақпасы. Шығыс стилінде салынған қақпаның биіктігі 10, ені 14 метрді құрайды. Қақпаның екі жағында күзет тұратын биік мұнаралары бар, ортасындағы қаспеттері әр түрлі ою-өрнектермен безендірілген. Айталық, бірінші беті «Тектұрмас этно-тарихи кешені» деген жазумен әшекейленсе, екінші бетінде «Тарих – тектіліктің белгісі» деген сөйлем жазылған. Қақпаның екі шетіндегі мұнаралардың іргетасы жергілікті табиғи тастан қаланса, ал қабырғалары тау-кен жынысы – травертинмен қапталған. Мұнаралардың алдыңғы жағында бойы 2 метр, ал салмағы 300 келі найза мен қылышпен жасақтанған сауытты екі жауынгердің мүсіндік бейнелері керемет үйлесім беріп тұр.
Жалпы, Әулиеата тарихи дерекке көз жүгіртсек, ХІ-ХІІ ғасырларда Қарахан мемлекетін 40 жылдай билеген, Тараз өңірінің өркендеуіне, білім мен ғылымның дамуына үлес қосқан, 63 жасында түркі әлемінде алғаш мәрте биліктен өз еркімен бас тартқан, ислам дінін таратушы діндар адам болған. Осы тарихи тұлғаның құрметіне арналып тұрғызылған ескерткіш теңіз деңгейінен 663 метр биіктікте орналасыпты. Салмағы 10 тонналық ақ түсті мәрмәр тастан құйылған ескерткіштұғыртасының биіктігінің өзі8 метр, ал мүсінінің биіктігі 13 метрді құрайды. Алып тұлғаның болмысын барынша ашуға басымдық берілген. Мүсіннің әр бедер, бөлік, кескіндемелеріне дейін аса ыждаһаттылықпен, ерекше ықыласпен сомдалған. Мәселен белдігі құдірет пен биліктің, ал ақ сақалы ұлылық пен даналықтың символын суреттейді. Батысқа байыппен қараған ұлы бабамыз, Тараз қаласы халқының бақуатты және берекелі өмір сүруіне өз батасын беріп тұрғандай.
Айта кетерлігі бұл алып мүсін биіктігі мен салмағы жағынан да республикадағы ең үлкен ескерткіш. Одан беріде, «Тектұрмас» тауының Талас өзені жағындағы ең биік беткейінде Тараз қаласын жоғарыдан көруге арналған тамашалау алаңшасы орналасқан. Бұл алаңда құс ұшу биіктігінен Тараз қаласының тынысы мен Талас өзенінің ағысына қарап, айналадағы тарихи дүниелерді тамашалауға барынша мүмкіндік жасалған.
Облыс әкімі Асқар Мырзахметовтің идеясымен салынған алып архитектуралық құрылыс мұнымен шектелмейді. Жоспарда екінші-үшінші кезеңдері бар. «Тектұрмас» этно-тарихи кешені қосымша тарихи және танымдық нысандармен кеңейтіледі. Жоспар бойынша ежелгі қалалар мен қамалдар қабырғаларының үлгісіне сәйкес, ортағасырлық қорғандар мен дуалдар салынады. «Көне Тараз» қорғаны ежелгі керуен-сарайлар мен цитадельдердің дәстүрлі архитектуралық бейнесі бойынша жасалады.
«Көне Тараз» қорғанынан Әулие-ата ескерткішіне дейін және әрі қарай жағалай созылып, демалыс аллеясы бой көтереді, оның екі жағында Тараз қаласы мен Жамбыл облысының әртүрлі аудандарында орналасқан 26 қасиетті тарихи орындарының кішірейтілген үлгідегі макеттері орын тебеді.
Әулиеата ескерткішінен «Көне Тараз» қорғанына жалғасып жатқан жол бойында қазақ жері тарихын түбегейлі өзгерткен ең ірі ұлы шайқастар – «Атлах шайқасы» мен «Аңырақай шайқасының» тасқа қашалған тарихи бейнесі монументалдық қабырға бетінде көрініс табады.Тарихи кешеннің төменгі жағында, монументалды қабырға мен Талас өзенін жалғайтын, тау басынан төгіле ағып жатқан каскадты су сарқырамасы салынады.
Осы өзеннің жағалауында кешенге келетін туристер мен жергілікті тұрғындарға қызмет көрсету нысандары, қонақтарға арналған дәмханалар мен демалыс орындары мен Талас өзенінің үстінде аспалы көпір орналасады.
Одан кейін төбенің сол жақ беткейінде аспалы жол стансасы бой көтереді. Бұл аспалы жол «Тектұрмас» этно-тарихи кешенін Тараз қаласының орталығында орналасқан «Көне Тараз» тарихи-этномәдени кешені мен «Көне Тараз» тарихи-мәдени орталығын байланыстырып, туристерге қаланы биіктен тамашалап аралауға мүмкіндік береді.

Орта Азияда баламасы жоқ «Көне Тараз» кешені

Ашылған нысандардың ішінде «Көне Тараз» тарихи-этномәдени кешенінің шоқтығы биік болғаны даусыз. Ұмыт болғанымызды жаңғыртып, өткенімізді қайта тірілткен кешендегі жобалар жан жадыратады. Бүгінде мыңжылдықтардың куәсі киелі өлкенің руханиятын оятып, рухын асқақтатқан, мерейін өсіріп, мазмұнын арттырған жобаны мамандар Орта Азияда баламасы жоқ туындыға балап отыр.
«Көне Тараз» тарихи-мәдени кешеніндегі ғаламат ғимараттар бірінен бірі өтеді. Облыс әкімі Асқар Мырзахметов пен еліміздің Мәдениет және спорт министірі Ақтоты Райымқұлова бастаған той қонақтары ең алдымен «Қолөнер және туризм» орталығына бас сұқты.
Орталық өңірдегі қолөнер шеберлері бас қосып, тың идеяларымен бөлісетін, тәжірибе алмасатын бірден-бір орынға айналады деп күтілуде. Оларға онда өздерінің зергерлік шеберліктерін жетілдіруге тиісті жағдай жасалмақ. Мұнда Шығыс, Батыс, Сыр, Арқа, Жетісу және басқа да аймақ үлгісіндегі бұйымдар жасалынатын болады. Қолөнершілердің ғажайып бұйымдарын сатуға да мүмкіндік тумақ.
Ал орталықтың екінші қабатында 7 шеберхана, жас қолөнершілерді оқыту сыныбы және «Тараз – Туризм» туристік ақпараттық орталығы орын тепкен.
«Көне Тараз» тарихи-этномәдени кешенінде халық жазушысы Шерхан Мұртаза атындағы «Руханият және тарихтану» орталығының да көпке берері мол.
Бұл орталық облыстағы шығармашыл жандарға қолдау көрсетіп, олардың талантын көпке танытатын шаралар өткізілетін орынға айналмақ. Орталықтың ашылу салтанатына қатысқан облыс әкімі Асқар Мырзахметов, Қазақстан Республикасы Мәдениет және спорт министрі Ақтоты Райымқұлова бастаған зиялы қауым өкілдері, шара қонақтары ғимараттың кіреберісінде орнатылған Шерхан Мұртазаның горельеф мүсініне гүл шоқтарын қойып, қайраткер рухына тағзым етті.
Орталық халық ауыз әдебиеті және әдеби шығармаларын зерттеу бөлімі және «Шерхантану», «Салт-дәстүр», «Дәстүрлі музыка», «Тарихтану», «Өлкетану» бөлмелері сынды бірнеше құрылымдардан тұрады.
Ал орталықтың екінші қабатындағы фойеде орталық атын иеленген Шерхан Мұртазаның жеке заттары, құжаттары, марапаттары мен фотосуреттері қойылған музей орналасқан.
«Көне Тараз» тарихи-этномәдени кешеніндегі «Ретро-фестиваль» амфитеатрының ашылуы да той көркіне көрік қосты.
Бұдан кейін ақын Маралтай Райымбекұлы Таразға арнаған жүрек жарды жырын оқыса, өңір өнерпаздары концерттік бағдарламасын ұсынды.
Келесі кезекте той қонақтары «Көр-кемсурет галереясындағы» теңдессіз туындыларды тамашалады. Тараздықтар мен қала қонақтарына қазіргі заманғы бейнелеу өнерін жаңа бағытта таныстыруға мүмкіндік беретін бұл ғимарат облыстың 80 жылдық мерейтойына орай ашылған «Көне Тараз» тарихи-этномәдени кешеніндегі басты нысандардың бірі. Жаңа ғимарат өңірдегі бейнелеу өнерін дамытуға, насихаттауға және қылқалам иелерінің шығармашылықтарын дамытуға негізделген.
Ал нысанның екінші қабатына көз салсаң, қалпына келтіру шеберханасы мен жұмыс бөлмелері орын алған. Онда болашақта балаларды бейнелеу өнеріне баулитын үйірмелер ашу жоспарда бар.
Мерейтой қарсаңында көпшілікке өңір тарихына қатысты тың деректерді ұсынып келген облыстық тарихи-өлкетану музейі жаңа ғимаратқа қоныстанды.
Музей табалдырығын алғаш болып облыс әкімі Асқар Мырзахметов бастаған зиялы қауым өкілдерімен бірге өлке тарихын тыңнан түре сала зерттеген тарихшы-ғалымдар қатар аттады.
Ежелгі шығыстық үлгіде салынған музей ғимараты 2 қабаттан тұрады. Оның жалпы аумағы 4015 шаршы метрді құрайды. Мұндағы тарихи жәдігерлер «Тарихқа дейінгі кезең залы», «Тараз қаласының тарихы», «Қазақ халқының этнографиясы», «Әулиеата кезеңі» сынды залдарға топтастырылған. Мұндағы әрбір жәдігер түрлі дәуірдегі өлке тарихынан, сол замандағы өмір сүру дағдысынан хабар береді. Ал «Тараз қаласының тарихы», «Әулиеата кезеңі» аталатын залға шоғырланған жәдігерлер 2000 жылдан астам тарихы бар шаһардың өткеніне шолу жасауға мүмкіндік береді.
Айта кету керек музейдегі тарихи-архитектуралық ескерткіштерді виртуалды түрде таныстыру мүмкіндігі келушілердің көңілінен шықты.
Музейге келушілерге олардың қалауы бойынша қазақ, орыс және ағылшын тілдерінде шолу жасалады.

Биіктігі 40 метр «Сағатының» асқақ үні

Тараздың «Биг-Беніне» айналып отырған «Сағат» стеласының тілі де мерейтой күні соқты. Тараздың брендіне баланып отырған нысан шаһардың кез келген бөлігінен көзге көрінетіндей етіп салынған. Стеланың биіктігі – 40 метр. Сағаттың диаметрі – 4 метр. Стела Самарқанд стиліндегі кірпішпен, майолик тасынан дайындалған. Ал сағаттың өзі Ресейдің Санкт-Петербург қаласында жасалынған. Мұндай алып «Сағат» стеласы елімізде алғаш рет Таразда бой көтеріп отыр.
Алып сағат тілі «Нұр-Сұлтан» қаласының уақыт өлшемімен бірдей жүріп отырады. Әрбір сағат сайын қоңырау соғылып, зорайтқыш дыбыспен белгі беріледі. Үш бөліктен тұратын сағат құрылысының негізгі іргетасы төрт тұғырлы биік бағаналармен бекітілген. Нысанның түгел болмысы орта ғасырлық шығыс үлгісінде әрленгені келушілерге әдемі әсер сыйлайтыны сөзсіз.
Айта кету керек, аталған стела орнатылған аумақта бұрын Жыр алыбы Жамбыл Жабаевтың ескерткіші тұрған болатын. Облысқа есімі берілген ақынның алып ескерткіші өңірдің бас ғимараты облыс әкімдігінің алдындағы алаңға көшірілді. Енді бұл аумаққа «Сағат» стеласын орнату оң шешім болып табылды. Ондағы мақсат – Тараз екі дәуірден астам тарихы бар қала десек, кешендегі «Сағат» стеласы өткен мен бүгіннің, болашақ пен келешектің, ғасырлар мен дәуірлердің өлшемін айғақтап тұрмақ.
Мұндай алып сағат әлем елдерінің белді қалаларында бар екендігі белгілі. Мәскеудегі Кремльде, Лондондағы «Биг- Бенде» және Меккедегі биік мұнаралы сағаттар соның айғағы. Тарихи Тараздың таңғажайып кешенінің аумағынан бой көтерген «Сағат» стеласы да келушілердің қызығушылығын оятып, туристер тартуға өз ықпалын тигізеді деп күтілуде.

Тілші түйіні: Иә, бұл тарихи Таразға жасалған теңдессіз тартулар. Облыстың 80 жылдығына өңір басшысы Асқар Мырзахметов 80 нысанның ашылатынын айтқан болса, бұл жоспар толығымен орындалды. Жыл басынан аудандарда түрлі әлеуметтік нысандар елге есігін айқара ашса, той күні облыс орталығындағы тарихи, һәм мәдени кешендер түйінін қойды.
Әрине Тараз топырағы бұған дейін мұндай тың бастамалар мен ауқымды өзгерістерді көрмегені ақиқат. Қалың бұқара құнды дүниелерге көз жүгіртіп, «Енді арбат іздеп Алматыға, тарихқа шырақ жағып Түркістанға барудың қажеті жоқ» деп қуаныштарын жасыра алмауда. Бұның бәрі ең бірінші ұрпақ үшін жасалып жатқанымен құнды. Ендеше түрленген Тараз, жасарған Жамбылдағы жан жадыратар жақсылықтар жалғасын тапсын деп тілейміз. Биылғы жылға да облыс әкімі Асқар Исабекұлының жоспарлаған жобалары аз емес. Осынау құндылықтарды да көруді Аллам жазсын!
80 жылдық белес құтты болсын, құрметті жамбылдықтар! Той тойға ұлассын!

Саятхан Сатылғанов,
Жамбыл облысы

Қадірлі оқырман, бүгін Жамбыл облысына арнаулы бет арнадық. Ұжымымыз ақылдаса келіп оны «Жамбыл жансарайы» деп атадық. егер бұдан да жақсы атау болса нұр үстіне нұр болар еді. Осыған ат салысуларыңызды өтінеміз.

 

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.