БЕРЕКЕЛІ ШАҢЫРАҚ

0
107

Әрбір ата-ана үшін жас құрақтай өсіп келе жатқан перзенттерінің қуанышын көруден асқан бақыт жоқ шығар, сірә. Нүрсейіттер әулетінің де бар бақыты – балалары. Бес бала тәрбиелеп отырған ерлі-зайыпты Нүркен мен Сарагүл сәбилерінің бойына ең көркем қасиеттерді сіңіруде.

Олар 2017 жылы Түркістан облысынан Оңтүстіктен-Сол­­түс­­тікке қоныс аудару бағ­дар­ламасы бойынша Мағжан Жұ­мабаев ауданындағы Октябрь ауылына көшіп келген. Бүгінде Нүркен Артықбайұлы елді ме­кендегі мек­тепте дене тәрбиесі пәнінің ұс­тазы болып қызмет етіп, оқушы­лардың түрлі спорт­тық жарыс­тарда топ жаруына ұйытқы болып жүр. Оның спортқа әуес ұл-қыздарды байқауларға өз қара­жа­­ты есебінен жөнелткен сәттері де аз емес.

Бұл отбасы Қызылжар өңіріне көшіп келген күннен бастап бау-бақша өсірумен айналысуда. “Еңбек етсең, емерсің” деген мақалды ата-анам бала күнімде жиі айтушы еді. Бізді де адал еңбек етуге бау­лыды. Шаруа­ларына қолғабыс етсек, маң­дайымыздан сипап, жы­лы сөз­дерін айтатын. Сол сәтте көңілім көтеріліп, мерейім өсіп қалатын. Енді осы тәрбиені балала­рымның бойына сіңіру­демін. Жазғы демалыста олар үнемі жанымда. Бау-бақшадағы ша­руаны тындыруға көмек­теседі”, – дейді Нүркен ағамыз.

Оңтүстіктегі жерлестерін кө­шіп келуге үгіттеп, ортамыздың толуына бір кісідей атсалысып отырған да осы азамат. Соның нәтижесінде Октябрь ауылына арнайы бағдарламамен көшіп келгендер қатары көбейген. Мысалы, Шерхан мен Гүлнұр Нүрсейіттер де өңірімізге келіп, өз ісін өрге домалатуда. Ал 20 жыл отасқан Нүркен мен Сарагүл болса, жас отбасына ақыл-ке­­ңестерін айтып, аяқтарынан нық тұрып кетулеріне көмектерін аяған емес.

Отанасы Сарагүл Сәрсен­құлқызы бастауыш мектептің оқу ісі жөніндегі меңгерушісі болып қызмет етуде. Ол қазақ балала­рын салт-дәстүріміз бен әдет-ғұрпымыздың негізінде тәр­биелеуде. Ол мектепішілік шара­лардың барлығында қазақтың болмыс-бітімінен сыр шертетін сахналық қойылымдардың мо­лынан болуын, балалардың ұлт­тық тәрбие негізінде өсіп-жетілуін үнемі қадағалап оты­рады. Ұстаз­дың пікірінше, бүгінгі күнгі жаһан­дану кезеңінде ұлттық тәрбие мен дәстүр сабақ­тастығын сақтау мәселесі өзекті. “Ұлттық құн­дылықтарымыз ұмы­тылып бара жатқан қазіргі уақытта осындай шараларды көптеп ұйымдас­тыруымыз керек. Әр ата-ана өзінің отбасы алдын­дағы жауап­кершілігін те­рең түсінсе, тәлім-тәрбие ісінде ұстаз­дарға көмек­тессе, саналы ұрпақ көбейер еді”, – дейді ол. Ұжымның да жұ­дырықтай болып жұмылып, береке-бірлікте алға қойған мақсаттарына нық қадам басуы­на үлесін қосып жүрген тәлім­гердің білім сала­сындағы қажыр­лы еңбегі елеусіз қалған жоқ. Бұ­ған оның аудан­дық, об­лыстық деңгейде алған мара­паттары дәлел.

Сарагүлдің ибалы келін, адал жар, ардақты ана болуына енесі Жақсыгүл Мұсақызының көмегі көп тиді. Ол отбасы тәрбиесіне қатысты бар білгенін келіндеріне үйретуден жалыққан емес. “Ша­ңырақтың шаттығы мен әулеті­міздің ақылшысы болып отырған енем балаларымды тәрбие­леуде көп жәрдемдесті. Ененің тәрбие­сін көріп, өнегесін ұға білген мен де болашақта келін­деріме жақсы тәрбие беруге тырысамын”, – деген Сарагүл апай бұл шаңы­рақтың сыйлас­тықты берік сақта­ған әулет екенін айтты. Ақ жау­лықты кейуана Жақсыкүл Мұса­қы­­зы бүгінде бес ұлы мен бес қызынан немере-шөбере сүйіп, бақытқа кенеліп отыр.

“Ағайын тату болса, ат көп, абысын тату болса, ас көп” демекші, бұл әулетте той болса, Сарагүл абысындарын бастап, әзірлік жұмыстарына кірісе кетеді. Бүгінде әр жерде жүрсе де, берекелері қашпады, бір­ліктері ыдырамады. Абысындар әр­дайым бір-біріне қол ұшын созып, бір жағадан бас, бір жеңнен қол шығара біледі. Бір әулеттің абыройын асырып, беделін биіктеткен абысын­дардың тату­лығын көріп өскен қыз да болашақта осындай үлгілі келін болатыны сөзсіз.

Өмірі, отбасылық бақыты мен балаларын байлығына балаған ананың аялы алақанының жы­луына бөленген перзенттері де ардақты ананың сөзін екі етпеуге тырысады. Үйдің үлкені Ерсұлтан іні-қа­рындастарына қа­райласып, ата-анасына көмек­теседі. М.Қозыбаев атындағы Солтүстік Қазақстан мемлекеттік университеті жанындағы жоғары медицина мектебінің студенті болашақта білікті дәрігер бо­луды армандайды. Қалған іні-қа­­­рындастары да жақсы оқу үлгерімімен ұстазда­рының оң пікіріне ие болып жүр.

Ауылдастары мен туған-туыс­­тарына сыйлы отбасы мем­лекет тарапынан көрсетіліп жат­қан қамқорлықтан да кенде емес. Сарагүл Сәрсенқұлқызы көп­балалы ана ретінде жәрдемақы алып отыр. “Мемлекет тарапы­нан көрсетіліп жатқан қолдауға ризамын. Әйтсе де, Үкіметке алақан жайып қана отырмай, адал кәсіппен шұғылданып ба­лаларыңның қажетін өтегенге, олардың елге сыйлы азамат бо­лып өсулеріне жағдай жасағанға не жетсін?” – деді Сарагүл.

Гүлбике КӨБЕНОВА,

журналист

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.