«Елім!», «Қазағым!» деп шырылдаған газетіміз биыл да биіктен көрінеді

0
213

Қадірлі оқырман!

Ассалаумағалейкум! Біздің басылымымызға сенім артып, оқырман болуға ықылас танытқаныңызға мың да бір алғыс. Мінеки, XXI ғасырдың тағы бір ресми жылының қақпасы ашылды. Жаңа жылдарыңызбен!
Әрине, сіздердің араларыңызда біздің газетімізбен бұрынан байланыста болғандарыңыз да, биыл тұңғыш рет басылымымыздың табалдырығын аттаушылар да бар шығар. Қош келдіңіздер! дейміз.

Халықаралық «Qazaqstan dauiri» деген атпен шығып жатқан газетіміздің шыға бастағанына биыл 22 қаңтарда 28 жыл толады. Тәуелсіздігіміздің алғашқы қарлығаштарының бірінен саналатын газетімізге бата беріп, ақ жол тілегендер елбасымыз Нұрсұлтан Назарбаев пен марқұм, Түркияның президенті болған Тұрғыт Озал. Газет аты ол кезде халықаралық «Zaman Қазақстан» деп аталып, алғашқы бас редактор белгілі драматург жазушы Қалтай Мұхамеджанов болып тағайындалды. Міне, содан бері бұл газет елдің ен таққан үлкен басылымына айналды. Мемлекет саясатын қолдай отырып ұлт мүддесін әрдайым жоғары ұстап, халқымыздың мүң-мұқтажын ойлайтын, қолдайтын басылым биіктерден де көрінді, төмендеген шақтары да кездесті. Бір-екі рет жабылып, қайта ашылды да.
Бұл газетке 2005 жылы келдім. Келгеннен соң ұжыммен ақылдасып, оның атын «Қазақстан Zaman» етіп өзгертіп, түрікшесін бөлек газет («Zaman») етіп шығардық. Бұл ат өткен жылы Түркияда саяси мәселелерге байланысты «Қазақстан заманы» болып өзгертілді. Биыл «Qazaqstan dauiri» деген ат бұйырды.
Басылымның тігінділерін ақтарсаңыз әрдайым ұлт мәселесін жоғары қойып, өткір де батыл мәселелерді, халықтың жанайқайларын жеткізгенін бағамдайтындарыңызға сөз жоқ.
2005 жылы елмен тығыз байланыс орнатып, үнемі жүзбе-жүз кездесуді алға мақсат қойған ұжым «Ауыл» экспедициясын ұйымдастырдық. Арнаулы көлік жалдап жаздың шыжғырған ыстығында бірде жолмен, бірде жолсызбен шаңдатып сол жылы бүкіл республиканы аралап шықтық. Ауылдың жақсылығы жетістіктерімен бірге 200-ден аса көкейтесті мәселе мен кемшіліктерді мұрнынан тізіп үкімет назарына ұсындық. Осы көтерген мәселелеріміз босқа кеткен жоқ. Он бес жылдан бері осы экспедициямыз тынымсыз жұмыс істеді. Қазір соңғы оншақты жылдың белеңінде «Nur Otan» партиясы мен ҚР Ауылшаруашылығы минстрлігімен бірлесіп, қанатын кеңге жайды.
«Әкіміміз қандай адам?» (қазір «Әкім бол, халқыңа жақын бол!») «Қазақшаң қалай министрлік!», «Жанайқай», «Қамшыбасар-тұжырым», «Айтылмаса сөз жеттім», «Отбасы», «Астана ажары», «Аймақтар тынысы», «Удан тазар, Қазағым!», «Шемпион», «Тарих қатпары», «Дүбірлі дүние-Саясат» т.б айдарларымыз, арнаулы беттеріміз арқылы көптеген мәселелерді тынбай, талмай, қажымай жазып келеміз.
Қадірлі оқырман! Ел ішінде бізді қолдап, көмектесіп газетіміздің таралымын көбейтуге үлес қосып жүрген белсенді оқырмандарымыз да бар. Олар сонымен қатар өткір, батыл, көкейтесті мақалалар да жазып отырады. Ол кісілерге алғысымыз шексіз. Сіздің өз өміріңізде немесе ауылыңызда, қалаңызда жақсы, келелі оқиғалар болса бізге жазыңыз. Қиындық ұшыраса көмектесеміз.

Сонымен мынау келген ресми жаңа жылымыз құтты болсын!

 

Ертай Айғалиұлы

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.