2020 жылы АӘК тағайындау механизмі қалай өзгерді?

0
132

Мемлекет басшысы Қасым-Жомарт Тоқаев Қазақстан халқына арнаған «Cындарлы қоғамдық диалог – Қазақстанның тұрақтылығы мен өркендеуінің негізі» Жолдауында ашықтықты, әділеттікті және еңбекке ынталандыруды қамтамасыз ете отырып, атаулы әлеуметтік көмек тағайындау тетігін түзетуді тапсырған болатын.
Осыған байланысты Үкімет әлеуметтік көмек көрсетудің жаңа механизмдерін енгізді.

2019 жылы қанша отбасы АӘК-пен қамтылды?
2019 жылы халықты атаулы әлеуметтік көмекпен қамту бойынша жыл басында 485 мыңнан астам отбасына немесе 2,5 млн астам адамға атаулы әлеуметтік көмек тағайындалды. Оның 190 мыңы көп балалы отбасы болса, жыл аяғына қарай нақты көмек алушылардың саны 315 мың отбасын құрады.

Оны тағайындау механизімі қалай өзгерді?
АӘК алушылардың дені көп балалы отбасылар болғандықтан, олар бөлек санатқа шығарылып, республикалық бюджеттен мемлекеттік жәрдемақы тағайындалды. Жәрдемақы 4 және одан да көпбалалы отбасыларға арналған. Жәрдемақы көлемі 42 500 теңгеден басталады және бала санына қарай артып отырады.

Тағайындау шартына сәйкес отбасылық кіріс қалай есептеледі?
Мүгедек балаларға арналған жәрдемақыны, студенттердің шәкіртақыларын, «Алтын алқа», «Күміс алқа» немесе бұрын «Батыр Ана» атақтарымен марапатталған көпбалалы аналарға берілетін жәрдемақыларды, атаулы әлеуметтік көмекті, кепілдік берілген әлеуметтік пакетті қоспағанда, еңбек қызметінен түскен табыс пен жәрдемақының барлық түрлері ескерілетін болады. Сондай-ақ микронесие мен грант алған жағдайларда алғашқы 6 айдан кейінгі табысы кіріс ретінде ескеріледі.

АӘК алу үшін қандай құжаттар тапсыру қажет?
Атаулы әлеуметтік көмекті алу үшін өтініш беруші өзінің тұрғылықты жері бойынша жұмыспен қамту орталығына, болмаса ауылдық жерлерде әкімдіктерге жүгінулері тиіс. Жеке куәліктің болуы міндетті, тиісті өтініш толтырылады. Өтініште отбасы жайлы толық ақпарат көрсетіледі: отбасы құрамы, табысы туралы мәліметтер және т.б. Сондай-ақ өтініш беруші уәкілетті органның тексеріс жүргізуіне келісім береді.

Құжаттарды онлайн тапсыруға бола ма?
Атаулы әлеуметтік көмек алушылардың құжаттары мен өтініштері онлайн жүйеде қабылданбайды. Бірақ 2018 жылға дейін арнайы жәрдемақы алған көп балалы отбасылар автоматты түрде жаңа жәрдемақы алушылар тізіміне енгізілді, қайта есептеу жұмыстары жүргізілді.

Кепілдендірілген әлеуметтік пакет дегеніміз не?
Бұл әлеуметтік топтама тек атаулы әлеуметтік көмек алатын отбасылардағы 1 жастан 18 жасқа дейінгі балаларға арналған. Енді АӘК әлеуметтік жағдайы төмен отбасыларға төленеді. Ең аз күнкөріс деңгейінің 70%-ын тағайындаудың шекті өлшемі қалады. АӘК мөлшері отбасының әр мүшесі үшін орташа жан басына шаққандағы табыс пен отбасының әрбір мүшесінің ең төменгі күнкөріс деңгейінің 70%-ның арасындағы айырманы құрайды.

Кепілдендірілген әлеуметтік пакет құрамы мен берілу жиілігі қандай?
Кепілдендірілген әлеуметтік пакеттің екі түрі бар, олар баланың жасына байланысты. 1 жастан 6 жасқа дейінгі балалар үшін азық-түлік тауарлары мен тұрмыстық химия тауарлары қарастырылған. Азық-түлік тауарлары түрлі жарма, пюре, шырын, сүт және т.б. қамтиды. Бұл азық-түлік өнімдерін темір мен басқа да дәрумендердің, минералдардың жетіспеушілігін ескере отырып, Денсаулық сақтау министрлігі ұсынды. Азық-түлік жиынтығын балалар ай сайын алатын болады.
Тіс пастасын, балаға арналған щетка, кір жуатын ұнтақ, сабын сияқты тұрмыстық химия тауарлары тоқсанына бір рет ұсынылады. Әр балаға бір пакеттен беріледі.
6 жастан 18 жасқа дейінгі балалар үшін ыстық тамақ, мектеп киімдері мен оқу құралдарын сатып алу, жол жүру шығындарын өтеу, сондай-ақ тегін медициналық қызмет көрсету қарастырылған. Мектеп жасындағы балаларға әлеуметтік топтама оқу жылының соңына дейін мектеп тарапынан беріледі. Ал азық-түлік жиынтығы мен химиялық тауарлар жергілікті атқарушы органдар арқылы үлестіріледі. Бүгінгі күні тауар сатып алынатын мекемелер Үкіметтің қаулысымен бекітілген.

Көп балалы отбасылар жәрдемақымен қоса АӘК ала ала ма?
Көп балалы отбасының табысы ең төменгі күнкөріс деңгейінің 70%-ынан төмен болса, отбасы арнайы жәрдемақымен қоса, атаулы әлеуметтік көмекті алуға құқылы. Отбасының осы тоқсандағы алатын мемлекеттік жәрдемақысы кіріс ретінде қаралмайды. Себебі, атаулы әлеуметтік көмекті тағайындау кезінде өткен тоқсанның табысы есептеледі. Сондықтан келесі тоқсанда көп балалы отбасының мемлекеттік жәрдемақысы кіріс ретінде ескеріледі.

Автоматтандырылған ақпараттық жүйе негізінде әлеуметтік қызметтер порталы арқылы қандай проблемаларды шешуге болады?
Елімізде 690 мыңнан астам мүгедек жан бар. Олар үшін жеке оңалту бағдарламасы әзірленеді. Сол бағдарламаға сәйкес, қажетті техникалық оңалту құралдары бүгінгі күні әлеуметтік қызметтер порталына енгізілуде. Осы уақытқа дейін аталған оңалту құралдарын сатып алу процесі 8 айға дейін созылған болса, портал арқылы техника 14 күннің ішінде жеткізіледі. Мүмкіндігі шектеулі жандардың қажетті оңалту техникасын бағасына, басқа да критерийлеріне сай таңдап алуға мүмкіндік бар.

Тілекгүл Есдәулет

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.