Бұл жақсы дәстүр жағымпаздыққа тосқауыл қояды

0
387

Ертең Қазақстан президенті Қасым-Жомарт Тоқаевтың туған күні. Мемлекет басшыларымен қатар, еліміздегі әртүрлі шенеуніктер сый жасауға, құттықтауға тырысатыны анық. Бірақ Тоқаев бұны білгендей, сезгендей алдын-ала тыйып тастапты. Ол туралы президенттің баспасөз хатшысы Берік Уәли фейсбук парақшасында жазды.

«Соңғы күндері бірқатар ақпарат құралдарының өкілдері «Мемлекет басшысы туған күнін қалай атап өтеді?» деген сауал жолдап жатыр.

Биылғы 17 мамыр жексенбі күніне сәйкес келіп отыр. Сондықтан Қасым-Жомарт Кемелұлы үйінде жұмыс істейді. Аталған датаға орай ешқандай шара өтпейді. Тіпті Президент Әкімшілігінің қызметкерлеріне туған күнімен құттықтамау, естелік сыйлықтар тарту етпеу туралы ескерту жасалды. Президент бұл күнді тойлағанды ұнатпайды. Өйткені ол кісінің отбасында балалардың да, ересектердің де туған күні тойланбайды екен. Ондай дәстүр қалыптаспаған.

Дегенмен ертең Қасым-Жомарт Кемелұлын туған күнімен көршілес мемлекеттердің басшылары телефон арқылы құттықтайды деп күтілуде. Қазірдің өзінде көптеген Мемлекет және Үкімет басшыларының, Парламент төрағалары мен халықаралық ұйым жетекшілерінің құттықтаған жедел хаттары келіп жатыр. Мұндай құттықтаулар ертең кешке дейін әлі де жалғаса береді деп ойлаймын», – деп жазды Б. Уәли.

Президентіміздің қарапайымдылығы мен кішіпейілділігін бұрыннан да білетінбіз. Ал туған күннің орны бөлек қой. Бұл күнді тойлағанды ұнатпауы шынында да тектіліктің белгісі. Біздің елімізде жағымпаздық, мақтау, мадақтау кең өріс алған. Көзді бақырайтып қойып мақтағанда көпшілігі қымсынбай зор шыдамдылықпен рахаттана тыңдайды. “Ұлық болсаң кішік бол” демекші президентіміздің бұл бастамасынан өзге әкім-қаралар да үлгі алуы тиіс. Мақтау-мадақ Аллаға ғана тән. Бүгін туған күніңізде тамаша үлгі-өнегені паш еттіңіз. Қалың еліңіз зор ризашылығын шын жүректен білдіріп жатыр. Осылай жағымпаздыққа тосқауыл қойсаңыз, әрі қарай жемқорлық та өз жөнімен кетеді. “Бәрекелді! Президент осылай болу керек!” деп жатыр халық. Қазақылық деген, бабаларымыздан қалған салт-дәстүрлерді тірілту деген осы! Адам осылай өз нәпсісін тыйып, ішкі жан дүниесіндегі иман шамын жарқыратып көрсете білуі ол – ерлік. Текті қазақ қана жасай алатын бұл бастама ұзағынан сүйіндірсін! Жақсы сөз – жарым ырыс. Аман-есен болыңыз! Осылай әрқашан да рухыңыз асқақтап тұрсын! Сіз басқарып отырған қазақ елінің ғұмыры ұзақ, байлығы, берекесі тасып, даңқы асып, алпауыт мемлекеттердің қатарына қосылуды Аллам нәсіп етсін!

Qazaqstan dauiri газетінің,

“Мөлдір бұлақ” журналының ұжымдары

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.