Сен – Қазақсың!

0
1007

Сен – Қазақсың!

Бір АЛЛАның құлысың!

Адамға адам құл болғаны — құрысын.

Жойқын соғыс, зұлматтар да жойылмай,

Қалған Ұлтсың.

Қаһармансың!

Ұлысың!

Сен – Қазақсың!

Ұлы дала – Тұғыры.

Күмбір-күмбір күрескерлік – ғұмыры,

Тірескеннің дірілдеткен тізесін

Тұлпарыңның тұяғының дүбірі!

Сен – Қазақсың!

Алғызбайтын барыссың!

Ар – ожданның асқағысың, намыссың!

Тағдырыңды танығысы келгендер

Тасқа басқан тарихымнан танысын!

Сен – Қазақсың!

Байырғы жұрт – түздегі ең,

Табиғаттан тән тамырын үзбеген.

Қолын жайып, Көктен өмір сұраған,

Жер бетінен жерұйықты іздеген.

Сен – Қазақсың!

Қазынасы – нәсіп, құт.

Қазақ болу – ғаламатқа ғашықтық.

Жерің, суың, тауың сұлу соншалық,

Көрген көзден кететіндей жас ытқып!

Сен – Қазақсың!

Отаншылсың, Тектісің!

Досыңа Адал, дұшпаныңа кектісің.

Бұл далаға мұрагерлік, иелік — Ұрпақтарға ұлы аманат деп түсін.

Сен – Қазақсың!

Рухы еркін, өзі еркін!

Мұзбалақсың, сорғалаған сөзі еркін!

Қайталанбас күйшісің сен құя алған

Домбыраның өзегіне өз өртін!

Сен — Қазақсың!

Ғарышкерсің, жаны – аспан.

Өрелісің, өз орнына таласқан.

Төрге лайық марқасқасың, мықтысың,

Төрткүл дүние саясатта санасқан.

Сен – Қазақсың!

Қазақ едің туғанда!

Онда, дүние тағылымынан үлгі ал да,

Ата жұрттан, Ана тілден айрылма,

Төбеңде Күн, төменде Жер тұрғанда!

Күләш Ахметова

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.