«Төтенше жағдай кезіндегі БАҚ-тардың рөлі қандай?» деген тақырып аясында ҚазҰУ-дың журналистика факультетінің түркі тілдес туысқандармен бірге өткізген зум-онлайн конференциясы

0
99

Бүгінгі күн тынысына орайластырып көтерген бұл мәселе өте ауқымды да маңызды екені сөзсіз. Карантин кезінде бұрын көзге іліне қоймайтын дәрігерлер адамзат өміріне зор қауіп төнгендіктен олар жанкешті қызметтерінің нәтижесінде жарқырап шығып, батыр жандарға айналды. Сондай-ақ төртінші билік деп жүрген журналистер де қай кезде, қандай жағдайда болсын елгезектігі мен белсенділігі арқасында, әсіресе осындай індет кезінде одан сайын қоғамдағы қозғаушы күштің алғы шебіне шықты. Иә, жер-әлем әп-сәтте төңкеріліп түсіп, коронавирус деген пәле оны лезде жаулап алды. Адамзат састы. Себебі мұндай сұмдық оқиға бұрын-соңды болмады десе де болады. Әлемде оба, құс, шошқа тұмаулары сияқты қорқынышты аурулар болғанымен, олар жаппай әлемдік сипат алған жоқ. Осындай қиын сын кезеңде БАҚ-тың рөлі қандай болу керек? Әрине алдыңғы шепте атойлап жүріп, өздерінің өміріне қауіп төнгеніне қарамастан пандемия тынысын елге жеткізу олардың парызы. Бейбіт шақта ғаламтормен тайталасуға шамасы келмей төменге қарай құлдырап сырғып кеткен теледидар карантинмен үйде қамалған қалың елдің ықпалымен оның рөлі бірден қарыштап өсіп, алдыңғы шепке шықты. Әлеуметтік желі, радио, газет, т.б. оның қасында жіп есе алмай қалды. Бірақ бір жаман жері елді үрей мен қорқынышқа бөледі. Елді осындай үрей құшағында ұстау біреулерге қажет болып жатыр ма деген күдік те жоқ емес. «Төтенше жағдай кезінде БАҚ-тардың рөлі» деген тақырып аясында өткен бұл конференцияның маңызы әрине өте жоғары. Біріншіден пандемия шырқау шегіне жеткен шақта шара жедел жасалынып отыр. Екіншіден теледидар, әлеуметтік желі т.б. жолдар арқылы пандемияның шетелдерде қалай жүріп жатқандығы жайлы сан түрлі сыбыстар арқылы біліп отырмыз. Ал конференцияда сол елдердің тұлғалары шынайы терең мәліметтерге қанықтырды. Үшіншіден түркі елдердегі туысқандарды өзара жақындастыруға кішкентай болса да үлес қосуға деген талпыныс бар. Төртіншіден әр ұлт өкілдері өз тілінде сөйледі. Түркі тілдерінің бір-біріне жақындығын осында сезіндік және тіл біздерді біріктіретін ұлы қуат күші екенін тағы да дәлелдеді.

Әрине шараға қатысушылар өз елдеріндегі пандемияның жай-жапсарын жеткізді. БАҚ-тың рөлін әңгімеледі. Мен де өз газетімнің не істеп, не қойып жатқанын баяндадым. Солардың ішіндегі назар аударатындары мыналар: қазақ баспасөзінің, оның ішінде мерзімді басылымдар басшыларымен онлайн дөңгелек үстел өткіздік. Оның тақырыбы: «Қазақ баспасөзіне қауіп төніп тұр!» Оны дәлелдедік. Ең басты мәселелерді ортаға салдық. Соның бірі пандемия мәселесі. Бұл індет кезінде газет-журналдардың таралымы, жазылуы тоқтайды. Ал ол біздің күнкөрісіміз. Сондай-ақ пандемия кезінде «Жақсы істерді жария ету» атты челенджіне қатыстық. Оқырмандарымыз фейсбук арқылы тікелей эфирге шықтым. Сайтымыз осы кезеңде өте белсенді істеп тұр. «Тәубеңе кел, тәкаппар әлем!» «Әлемнің мәңгүрттенуі мүмкін бе?», «Біз әкемізді сағындық!», «Бетперде киген Алматы індетпен күресіп жатыр», «Жұт жеті ағайынды», «Аз халықты ауызбіршілік қана індеттен құтқарады», «Тұтқындағы отбасыға шайтан-вирустың шабуылы», «Кәсіпкер қалай күн көрер?» т.б. маңызды-маңызды материалдар жарияладық. Егер оқығыңыз келсе газетіміздің сайтына кіріңіз. Жалпы мұндай конференциялар өте қажет. Осындай алмағайып қиын кезеңде бірігіп, ынтымақтаспасақ жан-жағымызда анталап тұрған алпауыт мемлекеттер бізді жұтып жіберуі әбден мүмкін. Қатарымызды көбейтейік. «Араласпасаң жатқа айналасың» деген қазақтың мақалы бар. ҚазҰУ-дың журналистика факультеті мұрындық болатын талай тақырыптар көп. Соларды қозғайық. Ұйымдастырушыларға көп рахмет! Атап айтқанда осы факультеттің ұстазы Шәрипа Нұржанованың ұйымдастырып, көп қолдау көрсеткені үшін зор алғыс білдіреміз. Кездескенше күн жақсы, туысқандар!

 

             Ертай Айғалиұлы,

Халықаралық «Qazaqstan dauiri» газетінің

бас редакторы

 

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.