Бұл ақиқат па, әлде байбалам ба?

0
414

   Әлеуметтік желіні мына атың өшкір жаман ауру туралы сан түрлі әңгімелер желп-желп еткізіп, дуылдатып, күркіретіп, дүрілдетіп жатыр. Біреу айтады «қорықпаңдар, ол әншейін-ақ нәрсе» дейді, екіншісі «ойбай, бұл ажалға апаратын өте қауіпті, қорқынышты ауру» дейді. Одан құтылудың жолдарын айтады біреулер.  Оған қарсы уәж айтады бір білгіштер. Қайсысына сенерін білмей бастары қатқан адамдар қаншама?! Ал ауырғандар тізімі күн сайын өсіп барады. Үрейленбейін десең де үрейге берілесің. Кеше менің уатсабыма мына мазмұндағы әңгіме түсті. Әңгіме емес жанайқай десе де болады. Аты-жөні белгісіз. Бірақ жанұшырған даусынан өтірік емес, яғни арандатып отырған жанға ұқсата алмайсың. Өзін Қызылордадан деп таныстырған азамат сынама, зертханалық зерттеудің біздің елімізде мүлдем жоқ екенін жеткізді. Адамдардың ауру екенін анықтайтын сынама, зерттеу тек Ресейде, Петербургта екенін, оған жіберілген сынамалар оншақты күннен соң келеді-міс. Ал теледидарда «Олимп» емханалық орталықтың басшысы Ерлан Сүлейменов «мұндай сынаманы өзіміз жасап жатырмыз» деп мәлімдеді. Егер аты белгісіз азаматтың айтқаны рас болса… онда масқара! Бұл мәселе жөнінде тиісті орындар жауап берсе екен.

 

Халықты жылатпайықшы!

Италияда өмір сүріп жатқан Дағыстан қызының жылап тұрып жеткізген сөзі кімді де болсын жылатқаны анық. Тебіренбеу, толқымау,жыламау мүмкін емес! Аш адамдар терезеден қол созып, айқайлап, жалынып бір жапырақ нан сұрап жатқанын естіген жан тәубесіне келеді деп ойлаймын. Бізде де осындай аштықтың алғашқы белгілері бар. Бұл шындық. Мемлекет 42500 теңге әлеуметтік көмегіне ел жете алмай сабылып жатыр. Біздіңше мұндай көмек алатын адамдар көп болатыны сөзсіз екенін орындаушы шенеуніктер білуі тиіс еді. Қоғам қайраткері Сәуле Мешітбайқызы «Ел Президентінің шешімдері орындалуымен құнды» деп айтқаны өте орынды. Қандай мәселе болсын шенеуніктеріміз мұқият, іскер, жауапты болуы тиіс. Кішкентай қателік қалың бұқараны ашындыруы әбден мүмкін. Әсіресе қазіргі төтенше жағдайда! Халықты жылатпаңдар! Осы қиындықтан бізді өтірік, жалған істер емес, ақиқат, шыншыл әрекет алып шығатынын сезінейік, ағайындар!

 

 

Баға шарықтады, үкімет қайда қарап отыр?

Шынында да халық бала мінезді. Әлеуметтік желілердегі дүмпулерге, сөздерге, ұйғарымдарға тез сеніп қалады. Әсіресе жанына жалау ем іздеген адам емшілердің, білгіштердің ем-домын тез жүзеге асыруға тырысады. Мәселен сарымсақ, лимон, имбир ем болады деп еді, халық жанұшырып базарларға лап берді. Қазір олардың бағалары аспанда жүр! Ең жаманы ұн қымбаттап кетті. Бір қап ұн бұрын 6 мың теңге болса, қазір 10-12 мың теңге! Басқа азық-түлік  бағалары да жалына қол жеткізер емес. Үкімет жиынында «бағаны жоғарылатпаймыз!» деп уәде берілген. Қайда уәде, үкіметтегі мырзалар? Бүйте берсек бүгін-ертең үкімет аламыз ба деп отырған 42500 теңге түк болмайтыны анық. Үкімет  тарапынан баға тез ауыздықталуы тиіс. Әйтпесе тағы да халықтың назасына ұшырып қалуымыз әбден мүмкін.

 

 

                                                                                              Ертай Айғалиұлы

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.