Қазақстан президентінің қабылдауында болған Ұлттық банк төрағасы Данияр Ақышев мемлекет басшысына Ұлттық банктің 2018 жылы атқарған жұмысының қорытындысы жөнінде есеп беріп, елдегі валюта-қаржы нарығының қазіргі ахуалы туралы баяндады. Бірқатар экономикалық индикаторлардың оң қарқынмен өсіп келе жатқанын атап өтіп, инфляция деңгейін төмендету үшін қабылданып жатқан шаралардың тиімділігі туралы мәселеге тоқталған Елбасы: «5,3 пайыз деңгейіндегі инфляция — бұл жақсы көрсеткіш. Бірақ бұған экономиканың тиімділігінен емес, нарықтағы өтімділік көлемінің қысқаруы есебінен қол жеткізіліп отыр. Ұлттық банк пен үкіметтің бұл бағыттағы жұмысы нашар. Қаражатты айналымнан шығару арқылы инфляцияны одан әрі төмендетуге болады, бірақ бұл шешімнің экономикаға қалай әсер ететіні белгісіз. Сонымен қатар ұзақ мерзімді несиелердің азайғанын байқауға болады», — деді. Мемлекет басшысы қолданыстағы заңнамаға бірқатар өзгерістер енгізілгеніне тоқталып, Ұлттық банк тарапынан бұл салаға тиісті бақылау жүргізілуі қажет екенін айтты.
Біз неден қорқамыз?
«Біз экономиканы банкроттықтан тазартпасақ, дұрыс дами алмаймыз. Үкімет те, банктер де қайта-қайта сүрінетін болады. Біз неден қорқамыз? Банкроттық институт нарықтық елдерде кең тараған. Сендер — Үкімет, министрлер емес, қорқақсыңдар. Шешім қабылдау үшін қолдарың мен тізелерің дірілдейді. Онда не үшін жұмыс істеп жүрсіңдер? Маған барлық банктерді тазалап беріңдер, сонда осы Үкімет міндеттерін адал орындады деп санаймын және осылайша отставкаға кетіңдер. Бұл нағыз жұмыс болар еді», — деді Нұрсұлтан Назарбаев Үкімет жиынында.
