Отбасы – тәрбие бастауы

0
90

Біздің Отанымыз – Қазақстан.Ендеше жастарымыз осы мемлекеттің мүддесін қорғайтын патриоттары болуы керек.Отанның ішкі-сыртқы саясатын қорғау жастардың қолында. Жастардың бойында жанашырлық, жақсылыққа қуана білу, бірін-бірі бағалау барынша мықты болуы шарт. Екінің бірі тумысынан дана,білімпаз ғұлама болмайды,оқудан,тоқудан,үйренуден барып адам өзін-өзі толыққанды етіп тәрбиелейді.

Париоттық сезім тұлғаның тектілігімен туындап, тәрбие арқылы өсіп жетіліп, патриоттық сана түрінде қалыптасады. Ұлттық патриотизм жеке адамның белгілі бір ұлтқа тән екендігін түсініп сезіну, өз ұлтының қасиеттерін бойына сіңіру және оны қастерлеп қадір тұтып, қорғап,сақтауға дайын болуы. Ғалымдар ұлттық патриотизмді қанмен, тектілікпен туа біткен қасиеттердің тәрбие арқылы бекіп, нығаюы, елін, жерін шексіз сүйіп, соған қызмет етуі, ұлттың барлық қасиеттерін ардақтау деп түсіндіреді.Демек, ұлттық патриотизм дегеніміз – қанмен, текпен туа бітетін, тәлім-тәрбие арқылы арқылы өсіп-жетілетін ұлттық сипаттағы саналы іс-әрекет пен мінез-құлық.
Отбасында әйел-аналар қыз баланың бойына инабаттылық, сыпайыгершілік, ізгілік қасиеттерін дарыта отырып, оның жан дүниесінің жете қалыптасуына үлкен мән берген.Әрбір отбасы,әке-шеше,аға-жеңге бойжеткен баласын ылғи да жібектей мінезімен, уыздай тәтті қылығымен, әдепті-ізеттілігімен, иманды-инабаттылығымен, күміс күлкісімен көргісі келген. Осындай ұлттық тәлім-тәрбие алған қыз бала болашақта ардақты ана, сүйкімді жар болары сөзсіз.
Халқымыз әйел – барша тіршіліктің бастауы, көркемдік пен жылылық көзі, шуақ пен мейірім әлемі, өмірдің сәні деп қасиетті санап, оған көңілінің төрінен орын беріп, ардақтап аялаған. Өйткені, әйел-ана-әрбір отбасының алтын діңгегі. Қазақ халқы ата-ананы пір тұтқан халық. Сондықтан болар тегімізді –атадан, тілімізді – анадан санаған халықпыз.
Бізді баққан апаларымыз: «Есіңде болсын, балам!» деп, өмірдің әр сәтінен мысал келтіріп, бізге түсіндіріп, айтып отыратын. Жай айтпайтын, мақалдап айтатын. Қазақтың мақалының өзі париоттық тәрбиенің бастауы дер едім. Мұнда ұлттық болмысты анық көруге болады. Қазіргі таңдағы біздің тәрбиеміз шалажансар,қайраңдағы балықты елестетеді. Сәлем – сөздің анасы дейміз, біздің жастар амандасу салтын да білмейді.Одан ары сөйлеу мәдениетінен жұрдай, әдеби тіл мен ауызекі тілді ажырата алмайды. Адамның сөз әдебінен-ақ оның қандай адам екенін білуге болады. Дұрыс ойлап, дұрыс сөйлей білген адам ғана ана тілінің қадірін біледі. Бір жағынан бұған балаларды да кінәлауға болмайды,өйткені үлкендер,анығын айтқанда, билік басындағылардың керекті-керексіз заңдары қоғамды шаршатты. Егер ұлтты құртуды ойласаң, онда тілінен баста деген қанатты сөз бекер айтылмаған. Соның бір айқын дәлелі қазіргі кезде балабақшадан бастап ағылшын тілінің үйретілуі. Мұның да екі жақты түсінігі бар. Біріншісі медициналық психологиялық тұрғыдан алғанда бала тілді тез меңгереді, есте сақтау қабілеттері өте жақсы болады. Ал екіншісі бала мәңгүрт, дүбара болып өседі.Неге дейсіздер ме? Ол өз ана тілінде ойлай алмайды, сөйлей алмайды. Өз ана тілінде ойлай, сөйлей алмайтын баладан қандай патриоттық тәрбие сұраймыз? Ұлттық дәстүрдің не екенін қайдан ұқсын. Мысалы Жапон елінде бала бастауыш сыныпты бітіргенше ешқандай шет тілін оқытпайды. Өз ана тілін жетік меңгерген бала ғана өз ана тілінде толққанды ойлай алады. Осыдан барып түсініспеушілік туындайды. Мені осы тіл мәселесі ұстаз ретінде қатты алаңдатады. Өзімнің әр сабағымда бір мақалды айтып, түсіндіріп отыру әдетке айналған. Біз өзіміздің құндылықтарымызды өзіміз дәріптемесек, ешкімге керек емеспіз.Байлаулы саясаттың көлеңкесінде кетіп, ана тілімізден ажырап қалмас үшін әрқайсымыз бұған көңіл бөлейік. Ұлттық рухымызды көтерейік. Сонымен қатар қыз бала тәрбиесіне де өте қатты көңіл бөлейік. Қыз бала – Ұлт Анасы болып саналады. Қорқыт ата кітабында, Атасыз ұл ақылға жарымас, анасыз қыз жасауға жарымас, Қыз ақылды ескермес, ана үлгісін көрмесе, ұл жарылқап ас бермес, әке үлгісін көрмесе деп текке айтылмаған. Ұлттық салт-дәстүрімізді білу, оның астарын түсініп, атадан балаға мирас ету қазіргі таңда, әсіресе қазақ қыздары үшін ауадай қажет. Қыз тәрбиелей отырып, ұлтты тәрбиелейміз деген қанатты сөздің өзі бала тәрбиесінің қаншалықты маңызды екенін білдіреді.

Айнаш Қыздарбекова,
Алматы облыстық тамақтандыру және қызмет көрсету саласындағы жаңа
технологиялар колледжінің мұғалімі

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.